Чешкиот претседател Милош Земан е хоспитализиран во вторникот во Централната воена болница во главниот град Прага, а при доаѓањето им отпоздравувал на камерите, пренесуваат медиумите.
Земан бил примен во болницата малку по 11 часот, а таму дошла и неговата сопруга Ивана. Според електронското издание на дневниот весник Pravo, хоспитализацијата на претседателот може да биде подолга.
Кабинетот на чешкиот претседател не се огласи за причината поради којашто Земан е префрлен во болница, а неговиот портпарол не бил достапен за коментар.
Порталот Novinky.cz, исто така, наведува дека претседателот би можел „подолго“ да остане во болница. Чешкото радио, пак, извести дека еден од советниците на Земан рекол дека слушнал како претседателот договара редовен преглед.
Порталот Novinky.cz објави видео-снимка на којашто се гледа како 76-годишниот Земан доаѓа со автомобил пред болницата и им мавта на камерите. Бил во инвалидска количка којашто често ја користи поради невропатија.
Покрај невропатијата на нозете, Земан се жали и на ослабен слух и низок крвен притисок. Претходно беше под лекарски надзор за дијабетес.
Во Централната воена болница во Прага од минатата седмица е хоспитализиран и претходникот на Милош Земан на претседателската должност, Вацлав Хавел, по нагло зголемување на крвниот притисок.
