Настов, директорот на ЈП „Улици и патишта“ поднесе неотповиклива оставка: Арсовска нема разбирање за реализација на клучни проекти

Неотповиклива остава од досегашната функција поднесе и директорот на ЈП „Улици и патишта“, Борис Настов. Тој на својот фејсбук профил објави дека причината за тоа е незадоволството од досегашната меѓусебна соработка со градоначалничката Данела Арсовска, поради немањето комуникација со неа и почитување, и недоразбирањата околу реализацијата на клучните проекти кои беа ветени од Град Скопје.

Тој напиша :

Почитувани, Најнапред сакам да се заблагодарам за довербата и поддршката што ми беше дадена за да раководам со ЈП Улици и патишта.
Пред 9 месеци, кога станав в.д. Директор на ЈП Улици и патишта, затекнав претпријатие во многу лоша состојба, како финансиски, така и во однос на реализацијата на проектите. Во изминатиот период работев напорно заедно со моите соработници, наспроти сите предизвици и проблеми, за да се подобри работењето на претпријатието, а во функција на исполнување на очекувањата на граѓаните. Мојата мотивација во работата беше реализација на проектите кои им ги ветивме на граѓаните на Град Скопје.
Иако преку спроведните проекти и воспоставените добри практики во работењето на претпријатието, многу работи се подобрија, реализацијата на проектите не се одвиваше според моите и очекувањата на граѓаните.
Затоа, ве известувам дека давам неотповиклива оставка на местото в.д. директор на ЈП Улици и патишта.
Оваа моја одлука ја донесов како резултат на неадекватната комуникација со Градоначалничката на Градот Скопје, како основач на претпријатието, како и немањето на разбирање при реализација на клучните проекти од интерес на Градот, а за кои јавното претпријатие имаше можност и потенцијал. Неможноста и покрај сите мои искрени намери и напори да воспоставиме меѓусебно разбирање, соработка и почитување како неопходни фактори за успешна имплеметација на зацртаните проекти и активности на претпријатието, придонесоа кон донесување на оваа моја одлука.
Искрено им се заблагодарувам на сите вработени и соработници во претпријатието кои работеа деноноќно на сите проекти и покрај отежнатите услови на функционирање, секогаш исполнувајќи ги задачите на највисоко професионално ниво, напиша Настов.

Доколку преземете содржина од оваа страница, во целост сте се согласиле со нејзините Услови за користење.