Интернисти од Скопје ќе помагаат во Инфективното одделение во Штип

Во последните 24 часа во болнички услови како последица на Ковид-19 починале 5 пациенти на возраст од 48 до 76 години. Институтот за јавно здравје денеска бележи намалување на процентот  на новозаразени и денеска има 102 дијагностицирани од 1356 тестови, или 7,5 проценти од тестираните.

Најмногу се во Скопје 39, а 11 во Куманово. Повторно е двоцифрена бројката и во Штип каде има 13 нови случаи и градот на текстилната индустрија е втора општина по број на активни случаи во државата. Има 419 лица кои се уште се позитивни на Ковид-19, а полно е и Инфективното одделение во Штипската болница.

Од утре на испомош на лекарите ќе пристигнат и двајца интернисти од Здравствен дом Скопје бидејќи во моментот во Штип на болничко лекување има 49 пациенти со корона вирусот.

Освен во ГОБ „8ми септември“, 87 пациенти има и на Инфективна Клиника од кои 40 се на кислородна поддршка, 10 возрасни и 4 деца се хоспитализирани во болницата во Козле а 207 заразени и сомнителни на Ковид-19 се низ останатите инфективни одделенија во државата.

Институтот за јавно здравје денеска регистрирал и 99 оздравени пациенти со што бројката на активни случаи во моментот е 4181.

Доколку преземете содржина од оваа страница, во целост сте се согласиле со нејзините Услови за користење.