Иран и протестите: Сечење коса како знак на поддршка за демонстрантите

Назанин Загари-Радклиф, британско-иранска државјанка, која шест години беше затворена во Иран, ја исече косата во знак на солидарност со иранските демонстранти.

Речиси две недели во Иран има демонстрации поради смртта на една млада жена во полициски притвор. Махса Амини (22) почина откако наводно ги прекршила правилата според кои жените треба да ја покриваат косата со хиџаб.

Според нејзиното семејство и сведоци, таа била претепана од полицијата кога била приведена, а потоа паднала во кома и починала три дена подоцна. Надлежните категорично демантираат дека била малтретирана.

На протестите во Иран, според активистите за човекови права, загинаа повеќе од 70 демонстранти. Сведоштва на уапсените на протестите во Иран: „Полошо е од видеата, полицијата е безмилосна“.

На видеото објавено од персискиот сервис на Би-Би-Си, Загари-Радклиф може да се види како си ја сече косата со ножици. „За мајка ми, за ќерка ми, за стравот од самица, за жените од мојата земја, за слободата“, вели таа на крајот од видеото.

Загари-Радклиф беше уапсена во Иран во 2016 година под обвинение за шпионажа, што таа го негираше. По преговорите меѓу британската и иранската влада, таа беше ослободена во март и се врати во Велика Британија.
Махса Амини почина откако три дена беше во кома во полициски притвор, тврди нејзиното семејство. Иранската полиција за морал го уапси Махса Амини во Техеран на 13 септември. Откако била однесена во притвор, таа се онесвестила, а подоцна починала во болница.

Полицијата соопшти дека нејзината смрт била предизвикана од ненадеен срцев удар, но семејството на Амини го негираше тоа и тврди дека била претепана од полицијата. Тие рекоа и дека младата жена никогаш немала проблеми со срцето.
Нејзината смрт предизвика антивладини протести, кои сега се проширија во повеќе од 80 градови и населени места низ Иран.

Иранската организација за човекови права со седиште во Норвешка тврди дека иранските безбедносни сили убиле најмалку 76 демонстранти. Државните медиуми јавуваат дека билансот на загинатите е 41, вклучително и неколку безбедносни лица, и ги обвинуваат „немирите“. Уапсени се стотици луѓе.

На многу видеа се гледаат жени како палат хиџаби и ја сечат косата за време на демонстрациите, за што активистите велат дека е антички персиски симбол на протест.

Доколку преземете содржина од оваа страница, во целост сте се согласиле со нејзините Услови за користење.