Измислен случај за судско-политички геноцид врз ВМРО-ДПМНЕ

Поранашниот премиер Никола Груевски на денешното рочиште за предметот „Титаник“ на СЈО, првообвинет за злосторничко здружување и изборни измами, во судот кажа дека се работи  за измислен случај со цел да се направи еден вид судско- политички геноцид врз неговата партија. Тој  рече дека не сторил ништо од тоа што му се товари, туку единствено раководел со партија која победувала на сите избори.

Инсинуации се наводите дека сум се договорил со некој од обвинетите и дека сум натерал да стори кривично дело, рече Груевски, кој додаде дека СЈО ги конструира овие случаи бидејќи партијата на која беше лидер до декември минатата година имала убедливо водство на сите избори.

 Груевски посочи дека обвинението се темели на целосни претпоставки и инсинуации и дека СЈО нема ниту еден доказ.
 Како што кажав повеќе пати ова обвинение како и сите останати се измислени со цел да се направи еден политичко-судски геноцид врз членови на политичка партија. Во овој предмет се обвинети 22 лица, а вкупно 100 со другите предмети, највеќе од нив се членови на ВМРО-ДПМНЕ. За да се случи ова спроведени се низа незаконски одлуки. Донесена е одлука во апелациониот суд аудио снимките да бидат користени како докази, спротивно членот 12 од ЗКП, рече Груевски.
 Тој кажа дека не  создал група и не потикнувал, туку само раководел со политичка партија составена од членови, органи и слично.
ВМРО-ДПМНЕ сосем легитимно ги добиваше изборите од 2005 до 2016 година со убедлива разлика пред втората по големина политичка партија. Сите избори беа следени од домашни и странски организации и постојат и извештаи. Разликите не беа за 500 или 1000 гласови, туку беа 200.000. Од тука бесмислено е формирање на било каква група која треба да обезбеди 500 или 1000 гласови, кои што ништо нема да променат во исходот. Во целост обвинението на СЈО се темели на претпоставки и инсуниации и ќе докажам дека нивното тврдење е апсурд и за тоа немаат ни еден доказ, истакна Груевски.

Доколку преземете содржина од оваа страница, во целост сте се согласиле со нејзините Услови за користење.