Фирма блиска до поранешниот генерален секретар на Владта, Драги Рашковски земала тендери вредни 850.000 евра од Дрисла, објави во понеделникот Наум Стоилковски, портпарол на ВМРО-ДПМНЕ
„Како во време на СДСМ, додека со Дрисла управува Коста Начевски, роднина на Рашковски и функционер на СДСМ, фирмата Алпима Градба на Александар Пиперевалиев од Струмица, бизнис партнер на Заеви и роднина на Рашковски склучува договори за изнајмување на машини со јавното претпријатие, за што му се исплаќаат близу еден милион евра? Фирмата Алпима Градба, сопственост на Пиперевалиев, од Струмица, близок до Рашковски, со само два договори од 2019 и 2020 година успева со изнајмување на машини да оствари приход од Дрисла близу милион евра?“, праша Стоилковски на денешната прес-конференција.
Посочи дека станува збор за фирма од Струмица, блиска до семејството на поранешниот премирт и до самиот Рашковски го добива тендерот за изнајмување машини во Дрисла и притоа изрази сомневање дека за „Алпима Градба“ е менувана тендерска документација во отворена постапка.
„Според договорот од 2020 година, вреден над 12 милиони денари, и тоа е првата работа откако Дрисла станува ЈП и со претпријатието почнува да управува Коста Начевски. Се распишува оглас за изнајмување на механизација, којшто првично содржи услови за заинтересираните да имаат минимален годишен приход од 20 милиони денари годишно три последователни години, последните години, да имаат најмалку 12 вработени и други критериуми коишто замислете додека е отворена постапката, се менуваат и се бришат! Односно огласот почнува да ги добива контурите токму како на фирмата на Пиперевалиев од Струмица, бизнис партнер на Заев и роднина на Драги Рашковски, во тој момент генерален секретар на Владата“, ја појасни Стоилковски постапката .
Вториот спорен момент, според портпаролот на ВМРО-ДПМНЕ, е што за договорот меѓу депонијата Дрисла и фирмата на Пиперевалиев е прекршен Законот за јавни набавки и договорот е склучен во четири очи.
„Додека државата тонеше економски, здравствено, образовно, и на секое поле, СДСМ тера бизниси во чија што основа лежат криминал и корупција. Се менуваат услови на тендери во отворена постапка, а бизнисите ги делат братучеди и роднини на функционери од владата. Тоа беше тенденцијата и сликата за владеењето на СДСМ изминативе пет години, тоа е сликата која што се уште не е сменета. Единствена промена ќе дојде со предвремени, брзи парламентарни избори“, заклучи Стоилковски.
