Кампањата за африканска чума кај свињите се проширува во уште девет земји

Европската агенција за безбедност на храна (EFSA) ги засилува напорите да го запре ширењето на африканската чума кај свињите во Европа со проширување на својата кампања во уште девет земји.

Минатото лето, EFSA започна голема кампања за подигнување на свеста за болеста во југоисточна Европа. Кампањата беше спроведена во партнерство со локалните власти во земјите што сочинуваат „регион за загриженост“ – Албанија, Босна и Херцеговина, Хрватска, Грција, Косово, Црна Гора, Северна Македонија, Србија и Словенија – поради нивната близина со земјите каде што е присутна африканската чума кај свињите.

EFSA сега ја проширува кампањата – првенствено насочена кон земјоделците – на Бугарија, Република Чешка, Литванија, Летонија, Полска, Словачка, Естонија, Унгарија и Романија.

Николаус Криз, раководител на Единицата за здравје на животни и растенија на EFSA, изјави: „Како научна организација, работиме неуморно на давањето проценки и препораки што можат да им помогнат на земјите зафатени од африканската чума кај свињите, за да ги заштитат своите животни и економии.“

„Минатата година решивме да се насочиме во таа насока и да прикажеме дека EFSA е посветена кон помагање на земјоделците и другите што живеат во сенка на оваа страшна болест. Кампањата беше добро прифатена во првата фаза на земји и сега одиме понатаму со нашата порака за откривање, спречување и пријавување.“

Кампањата ги надополнува тековните напори на Европската комисија и на другите меѓународни организации, насочени кон искоренување на болеста во Европа.

Африканската чума кај свињите (ASF) е вирусно заболување што влијае врз домашните и дивите свињи. Вирусот е безопасен за луѓето, но предизвика значителни економски нарушувања во многу земји. Не постојат вакцини, па епидемијата во зафатените области може да наметне колење на голем број свињи кои што се чуваат на фарми.

Кампањата има за цел да ги подигне свеста и разбирањето за африканската чума кај свињите во сите 18 земји и е насочена кон групи луѓе и поединци, кои стапуваат во контакт со домашни и диви свињи, особено кон одгледувачите на свињи. Истата се спроведува со непроценливата помош од локалните ветеринарни организации, земјоделски здруженија, ловечки здруженија, граничната полиција и други релевантни тела.

Поради тоа што епидемијата на африканската чума кај свињите може да има такви разорни последици, откривањето, спречувањето и пријавувањето се клучни ако сакаме да ја искорениме оваа болест.

Ширењето на клучните пораки ќе биде дополнително реализирано со споделување табели со факти, инфографици, објави на социјалните медиуми, како и други материјали. Дознајте повеќе на интернет-страницата на кампањата: www.efsa.europa.eu/StopASF

Доколку преземете содржина од оваа страница, во целост сте се согласиле со нејзините Услови за користење.