Три граѓани на Свети Николе, не ја почитувале забраната за движење од 21.00 часот, до 05.00 часот, односно до 12.00 часот.
Во соопштението на Јавното обвинителство, се вели дека еден од обвинетите, при прогласена епидемија на опасната заразна болест Ковид-19, не постапил според Одлуката на Владата, за забрана на движење која стапи на сила на 23 март, а со цел спречување на ширење на заразната болест и заштита на населениeтo.
– За време на забраната, ноќта на 25.03.2020 година во 00.20 часот со своето возило тој се движел по улиците во градот, велат од Јавното обвинителство.
Воедно, другите двајца обвинетите не ја почитувале Одлуката на Владата, донесена на 24 март, со која се воведува забрана за движење на подрачјето на државата во временскиот период од 21.00 часот до 12.00 часот наредниот ден за лица со возраст до 18 години.
– Обвинетите во одделни настани заедно со нивните малолетни деца го напуштиле својот дом, биле пресретнати од полициски службеници, информираат од Јавното обвинителство.
Со овие дејствија обвинетите според Обвинителството го сториле кривично дело „непостапување според здравствените прописи за време на епидемија“. Основното јавно обвинителство Свети Николе до Судот ги поднесе предлозите за издавање казнени налози, со предлог за секој од обвинетите Судот да изрече парични казни во висина од по 98 дневни глоби, секоја од нив во висина од 20 евра во денарска противвредност.
