Доколку во некоја општина анализите покажат дека воздухот е загаден повеќе од дозволеното градоначалникот ќе добие парична казна од 2.500 до 5.000 евра.
Ова го додаде соседна Бугарија во законот за чистота на атмосферскиот воздух. Градоначалниците имаат рок од една година да го намалат загадувањето.
Доколку тоа не се случи ќе следуваат казни. Истите казни ќе следат и за домаќинствата кои со несоодветен материјал за греење ќе допринесат за зголемување на штетните материи во воздухот. Кај нас пак, надлежните се уште изготвуваат мерки против загадувањето.
Со намалувањето на температурите, кај нас, веќе се чувствува и присуството на штетните честички во воздухот. Во неколку скопски општини изминатиов период канцерогените честички се искачија и до 200 микрограми на метар кубен, што е четири пати над дозволената граница. И додека градончалниците допрва ги објавуваат мерките со кои му објавуваат војна на загадениот воздух, граѓаните сепак велат, битката со ПМ10 честичките и оваа зима ќе биде тешка.
А падот на температурите ги вжештија и линиите на Брзата помош. За 20 отсто се зголемил бројот на интервенции.
Докторите советуваат хронично болните редовно да ги земаат терапиите. Да се внимава на температурните разлики во домот и надвор. Сите да конзумираат здрава храна. Доколку немаат потреба граѓаните да не го напуштаат домот во раните утрински часови, кога температурите се ниски, а посебно да внимаваат трудниците и малите деца.
