Киев ги отфрли сугестиите на поранешниот генерален секретар на НАТО Андерс Расмусен дека Полска би можела да испрати војници во Украина. Украинската влада никогаш не побарала таков чекор, тврди нејзиниот висок дипломат.
„Додека не заврши вооружениот конфликт на украинска територија, странските држави нема да испраќаат свои војници во нашата земја. Згора на тоа, ние не го бараме тоа. Ние велиме: „дајте ни оружје“, вели министерот за надворешни работи Дмитриј Кулеба, коментирајќи ги забелешките на Расмусен.
Поранешниот шеф на НАТО посочи дека може да се оствари сценарио за интервенција, доколку воениот блок предводен од САД не ѝ понуди формални безбедносни гаранции на Украина за време на самитот во Вилнус, Литванија следниот месец.
Украинскиот претседател Володимир Зеленски, наводно, се заканил дека ќе го бојкотира настанот доколку неговата држава не добие конкретен патоказ за членство.
Кулеба изрази сигурност дека Украина ќе стане дел од НАТО, инсистирајќи дека Киев потоа ќе распореди воени единици кај другите сојузници за да ги бранат. Аспирацијата да се приклучи на блокот е содржана во украинскиот устав.
Москва ги опиша воените дејствија во Украина како конфликт против целата западна воена организација, која обезбедува оружје, обука, разузнавање и други форми на помош за Киев.
Руските власти, исто така, ги обвинија членките на НАТО дека го олеснуваат регрутирањето на платеници во Украина и сугерираат дека воен персонал од државите донатори можеби управува со дел од оружјето испратено во земјата.
САД претходно потврдија дека имаат мал контингент воен персонал во Украина, но тврдеа дека нивната улога е да ја надгледува воената помош што ѝ се дава на Украина.
НАТО и сојузниците инсистираат на тоа дека не се страни во вооружениот конфликт, спротивно на руските тврдења.
