На азискиот безбедносен самит во Сингапур, на Дијалогот Шангри-Ла, кинескиот министер за одбрана Ли Шангфу, ги обвини „некои земји“, речиси имплицитно мислејќи на САД, за интензивирање на трката во вооружување и намерно мешање во внатрешните работи на други земји.
– Менталитетот на Студената војна сега повторно се буди, во голема мера ја загрозува безбедноста – рече тој.
– Меѓусебното почитување треба да надвладее над насилството и хегемонијата.
Говорејќи на безбедносниот состанок во саботата, американскиот секретар за одбрана Лојд Остин ја обвини Кина дека ги отфрла воените преговори, кои ги доведоа суперсилите во конфликт околу Тајван и територијалните спорови во Јужното Кинеско Море.
Кинескиот министер за одбрана ги предупреди САД да не се мешаат во спорот со Тајван, заканувајќи се со употреба на сила.
– Ако некој се осмели да го одвои Тајван од Кина, кинеската армија нема да се двоуми ни секунда. Нема да се плашиме од нашите противници и решително ќе го заштитиме националниот суверенитет и територијалниот интегритет без разлика на цената – рече Ли во говорот на Шангри-Ла дијалогот во Сингапур, конференција организирана од Меѓународниот институт за стратешки студии.
Ли ја критикуваше американската продажба на оружје и воена обука на Тајван, како и подобрувањето на односите меѓу Вашингтон и Тајпеј.
– Тајван е внатрешно прашање на Кина – рече министерот во првиот настап на безбедносната конференција.
Според него, Тајван е кинески Тајван, а како да се реши тајванското прашање е работа на Кинезите.
– Секој чин на замаглување на принципот на една Кина е и апсурден и опасен. Обединувањето на Кина е најважниот историски тренд и незапирлива насока. Ќе ја истражиме перспективата за мирно обединување со најголема искреност и напори. Но, ние не ветуваме дека ќе се откажеме од употребата на сила. Ако некој се осмели да го одвои Тајван од Кина, кинеската армија нема да се двоуми ни секунда – рече тој.
Врски на ниско ниво
Ли рече дека односите меѓу Пекинг и Вашингтон се на „рекордно ниско ниво“ од почетокот на односите во 1979 година.
Што се однесува до недостигот на комуникација, за што САД сѐ повеќе се жалат, генералот рече дека во принцип Кина е отворена за разговори меѓу двете сили, но само доколку тие се „засноваат на меѓусебно почитување“.
Ли го одби барањето на САД да се сретне со американскиот секретар за одбрана Лојд Остин на маргините на конференцијата.
Дијалогот Шангри-Ла на ниво на министри за одбрана се смета за најважен безбедносен форум во регионот. Четириесет земји испратија свои претставници.
Односите меѓу Кина и САД паднаа на ниско ниво по соборувањето на кинескиот шпионски балон во февруари и откажувањето на посетата на Кина на американскиот државен секретар Ентони Блинкен.
Односите меѓу Вашингтон и Пекинг се затегнати поради низа прашања, вклучувајќи ги Тајван, Јужното Кинеско Море и ограничувањата наметнати од Џо Бајден за извозот на полупроводници.
Ли, кој беше санкциониран од САД во 2018 година за купување оружје од Русија, се ракуваше со Остин во петокот, но тие не влегоа во подлабоки разговори и покрај постојаните барања на САД за повеќе преговори на воено ниво, пренесува „Јутарњи лист“.
Зборувајќи анонимно на маргините на конференцијата, двајца кинески воени офицери истакнале дека Пекинг сака јасен сигнал од Вашингтон дека ќе преземе помалку конфронтациски пристап кон Азија – вклучително и укинување на санкциите за Ли – пред да се обиде да ги продолжи преговорите на воено ниво.
Претходно денеска, војската на Тајван соопшти дека 15 борбени авиони и седум воени бродови на Народноослободителната војска на Кина се во близина на островот.
И два противподморнички хеликоптери КА-28 влегоа во зоната за идентификација на тајванската противвоздушна одбрана, се додава во соопштението што го пренесе ТАСС.
