Американската компанија „Johnson & Johnson“ планира следната седмица да побара одобрение од Американската агенција за храна и лекови (FDA) за итна употреба на нејзината вакцина, која се применува во единечна доза, а како што објавија, ефикасноста е помеѓу 66 и 72 проценти.
Според компанијата, оваа ефикасност е прикажана во САД, додека клиничките испитувања на три континенти покажале дека е 66 проценти ефекасна против различни варијанти на вирусот.
Во истражувањето спроведено на скоро 44.000 волонтери, нивото на заштита од умерени и тешки форми на болеста е 66 проценти, но само 57 проценти во Јужна Африка, каде се појави загрижувачка варијанта на коронавирусот.
Ова се послаби резултати од оние со висок степен обезбедени од двете веќе одобрени вакцини на „Pfizer/BioNTech“ и „Moderna“, кои во испитувањата покажаа ефикасност од околу 95 проценти во спречување на симптомите на болеста кога се даваат во две дози.
Главната цел на студијата на „Johnson & Johnson“ беше да се проучи ефикасноста на вакцината во спречување на умерени и тешки форми на болеста, а се покажа дека е 85 проценти ефикасна во спречување на сериозни симптоми и спречување хоспитализации и против разни варијанти 28 дена по имунизацијата.
Европската комисија уште во октомври минатата година објави дека го одобрила договорот за набавка на дози за 200 милиони луѓе од потенцијалната вакцина против коронавируост со фармацевтската компанија „Janssen Pharmaceutica NV“, која е дел од групацијата компании „Janssen Pharmaceutical Companies of Johnson & Johnson“. Компанијата има договор и со американската влада за развој на вакцината во износ од 486 милиони долари, како поддршка на истражувањата.
