Пер Вастберг, кој беше ко-основач на шведскиот огранок на Амнести интернешнал, поднесе оставка од организацијата во средата. Шведскиот активист рече дека неговото заминување се должи на извештајот на Амнести за конфликтот во Украина и дека организацијата го надминала својот првичен мандат да се залага за политичките затвореници.
„Јас сум член повеќе од 60 години. Со тешко срце, поради изјавите на Амнести во врска со војната во Украина, ставам крај на долгиот и плоден ангажман“, изјави Вастберг за весникот Свенска дагбладет, каде што е повремен колумнист.
„Од своето основање, Амнести работеше за слободата на политичките затвореници насекаде во светот“, рече Вастберг, кој го основаше шведскиот огранок во 1964 година. „Оттогаш постепено, понекогаш дискутабилно, го прошири својот мандат“, додаде тој.
Амнести се соочи со бројни критики откако објави извештај на 4-ти август во кој се вели дека Украина намерно поставува војници и воени возила во станбени области и болници. Извештајот е заснован на истражување во источна Украина, од април до јули.
„Документиравме шема на украински сили кои ги ставаат цивилите во ризик и ги кршат законите за војна кога дејствуваат во населени области“, рече тогаш генералниот секретар на Амнести Интернешнл, Агнес Каламар.
Директорката на Амнести за Украина, Оксана Покалчук, поднесе оставка по извештајот. Владата во Киев ја обвини невладината организација за ангажирање во проруска пропаганда. Претседателот Владимир Зеленски рече дека секој што фрла сомнеж за жртвата на Украина е „соучесник на Русија“ и „самиот терорист“.
Иако невладината организација оттогаш се извини за „неволјата и гневот“ предизвикани од нивното соопштение за украинските тактики, таа не го отфрли извештајот. Каламар ја коментираше критиката велејќи дека „воената пропаганда, дезинформациите “ од онлајн троловите „нема да ја нарушат нашата непристрасност и нема да ги променат фактите“.
Генералниот секретар на Амнести Шведска, Ана Јохансон, во интервју во средата рече дека „околу илјада“ членови се обиделе да ја напуштат организацијата поради извештајот за Украина. Таа, сепак, истакна дека Амнести Шведска се соочила со поголема криза кога усвоила нова политика „за правата на луѓето кои имаат секс за пари“.
Иако Украина има право да се брани, рече Јохансон, тоа „не значи дека има право да го прекрши меѓународното хуманитарно право. Затоа дискусијата мора да ги опфати и дејствијата на Украина – инаку ќе и дадовме карт-бланш на Украина без оглед на тоа што прави.
