СЈО од ден на ден, со своето противзаконско работење, докажува дека е обичен политички инструмент во рацете на Зоран Заев и СДС, кој треба да им помогне да се пресметаат и замолчат противниците и неистомислениците. За да ја остварат својата цел, се закануваат по институции и игнорираат закони за што и ќе одговараат кога ќе се врати правната држава, а СДС ќе замине од власт, изјави Дарко Костовски од ВМРО-ДПМНЕ на денешната прес-конференција.
-Наместо да го работат тоа за кое што беа формирани и да ги гонат криминалците кои го рушеа безбедносниот систем, односно злосторничкото здружение обединето во предметот „Пуч“ кое незаконски прислушуваше телефонски разговори и ги монтираше и препродаваше, тие го направија спротивното. Го амнестираа Верушевски и Заев и сега се обидуваат да издејствуваат незаконска и ирационална одлука за да го озаконат нивниот криминал преку признавање и институционална употреба на монтираните, незаконски прислушувани материјали, истакна Костовски.
Вели дека ако СЈО работело согласно законот и ако применувале барем „П“ од правото, уште првиот ден од нивното работење согласно доказите за „Пуч“, Заев и Верушевски, ќе требало да одговараат.
Со амнестијата и легализацијата на криминалите на Заев, вели Костовски, СЈО уште еднаш на дело потврди дека е под контрола на СДСМ чија единствена цел е, како што рече, да конструира и монтира случаи против раководството на ВМРО-ДПМНЕ, заради политичко оцрнување во очите на јавноста.
-СЈО со континуираниот политички притисок врз судовите, со барањето за одземање пасоши на функционери на ВМРО-ДПМНЕ, има една и единствена цел, а тоа е создавање димна завеса и тотален дефокус од антидржавните политики кои ги спроведува СДС во изминатиот период. Дефокус од донесување на штетниот Закон за двојазична Македонија, пренасочување на јавноста од неспособноста и некадарноста на новата влада во справување на пожарите и огнените стихии кои ја доведоа Македонија на работ на еколошка катастарофа, потенцира Костовски.
Посочи дека СЈО како политичка алатка на СДСМ има цел политичка дискредитација на ВМРО-ДПМНЕ, надевајќи се дека на СДСМ и Зоран Заев ќе му овозможи подобра стартна позиција пред претстојните локалните избори.
-СЈО е веќе прочитана од граѓаните и нема кредибилитет. ВМРО-ДПМНЕ предупредува дека оние кои работат спротивно на законите за да исполнат на политички нарачки на одредени лица, треба да бидат свесни дека ваквите противзаконски дејствија ќе бидат ревидирани и сакционирани веднаш по враќањето на ВМРО-ДПМНЕ на власт. Многу бргу ќе дојде до воспоставување на правната држава и функционирање на институциите. Сите криминалци и прекршители на законот ќе одговараат. За криминалите и антидржавните дејствија мора да има соодветни санкции, рече Костовски.
Додаде дека ваквиот антидржавен начин на владеење, јавноста го препознава и оти СДСМ поради водење на ваквите штетни политики, ќе биде поразен на наредните локални избори.
Доколку преземете содржина од оваа страница, во целост сте се согласиле со нејзините Услови за користење.