Андреј Жерновски оваа година се одлучи да направи паралелна прослава на Нова Година на само 50 метри од централната прослава која со години традиционално се организира на градскиот плоштад во Скопје.
Притоа општина Центар не посочи колку средства ќе потроши за четиридневниот настан. Хрватските медиуми посочуваат дека само настапот на групата Прљаво Казалиште која е планирана да настапи на самата новогодишна вечер, ќе чини над 30.000 евра. Целокупниот настан според познавачите треба да чини стотици илјади евра.
Со ваквиот потег на Жерновски сите тврдења дека нема пари за реконструкција на училишта и градинки и дека општинската каса е празна паѓаат во вода. Тој само пред неколку месеци се жалеше дека нема пари да ги плати учителките за целодневна наставна во основите училишта во Центар, а денес организира скапи и непотребни новогодишни прослави.
Дочекот на Нова Година на плоштадот Македонија се организира традиционално 15 год и оваа традиција ја почитувале и Ристо Пенов и Труфун Костовски и Коце Трајановски. Овој преседан на Жерновски значи и удар на традиционалната прослава во Центар и Градот Скопје. Ова е прв пат Општина Центар да органзира паралелна прослава на нова Година, а уште позачудувачки е што овој настан ќе го одржи на Сквер Јадран кој е во непосредна близина на Плоштадот. Граѓаните коментираат дека за Нова Година ќе се случува хаос поради прославата органзирана од Општина Центар, бидејќи на растојание од само 50 метри ќе бидат поставени две бини и паралелно ќе се случуваат два концерти.
Останува нејасно зошто градоначалникот Андреј Жерновски не понудил заеднички да учествува во традиционалната прослава или не го направил настанот во некој друг дел на општина Центар кај што досега не била органзирана ваква прослава. Очигледно кај Жерновски била посилна желбата наместо со прослава да се занимава со политика и поделби на самата новогодишна вечер.
Оваа сума на пари којашто Жерновски ќе ја потроши воопшто не е за занемарување. Општина Центар можеше овие средства да ги искористи за обезбедување на целодневна настава во основите училишта во центар, за изградба на нови паркови, детски игралишта или асфалтирање на улици.
