Македонскиот ракометен првак Вардар, потпиша тригодишен договор со Хрватот Блаженко Лацковиќ (33) со важност од сезоната 2014/2015. Левиот бек на Хамбург доаѓа во Македонија по десет сезони минати во Бундеслигата каде настапуваше за тимовите на Фленсбург и на Хамбург, а сега го засилува Вардар кој што со неговиот ангажман добива искусен играч, и во напад и одбрана.
Искуството на Лацковиќ (висок 197 см, тежок 97 кг) се гледа по деветте медали што ги има освоено со репрезентацијата на Хрватска, и четирите шампионски титули во домашните првенства на Хрватска (трипати со Загреб) и Германија (Хамбург), како и европската титула, лани со Хамбург во Лигата на шампионите.
Долги години Лацковиќ беше нераздвоен дел на хрватската репрезентација со која во 2003 година го почна победоносниот од, и почетокот на жнеењето на медали од големите натпреварувања. Требаше да настапи и на последното ЕП во Данска, во јануари 2014 година, но поради повреда мораше да остане дома.
Целта на Вардар е во своите редови да има искусни, проверени и квалитетни играчи, а токму Лацковиќ е еден од нив.
„Вардар може да го потврди трансферот на Блаженко Лацковиќ кој ќе стапи на сила од сезоната 2014/2015 со важност во следните три години. Со неговото ангажирање, екипата добива уште еден врвен професионалец кој игра на позицијата лев бек, со подеднакви квалитети во нападот и одбраната. Среќни сме што и Блаженко Лацковиќ во Вардар препозна сериозен и квалитетен клуб, со амбиција да биде секогаш во врвот. Со неговото доаѓање во Вардар, ги потврдуваме и нашите амбиции за создавање на силна, конкурентна и пред се хомогена екипа која ќе може да се спротивстави на секој ривал. Се надеваме дека ова ќе биде почеток на една успешна соработка на Блаженко Лацковиќ и Вардар која ќе трае и ќе биде исполнета со успеси”, вели Давор Стојаноски, директорот на Вардар.
Податоци за БлаженкоЛацковиќ
Роден: 25 декември 1980
Висина: 197 см
Тежина: 97 кг
Позиција: лев бек
Настапи за репрезентација: 157
Голови за репрезентација: 571
Досегашни клубови:
1997-2001Вартекс
2001-2002Метковиќ Јамбо
2002-2004 Загреб
2004-2008 Фленсбург
2008- 2013 Хамбург
Првак на Хрватска со Загреб и првак на Германија со Хамбург. Освојувач на Куп на Германија со Фленсбург (2005) и Хамбург (2010). Победник на Супер куп во 2009 и 2010 година.
Репрезентација на Хрватска
Олимписки Игри
2004 Атина – злато
2012 Лондон – бронза
Светско првенство
2003 Португалија – злато
2005 Тунис – сребро
2009 Хрватска – сребро
2013 Шпанија – бронза
Европско првенство
2008 Норвешка – сребро
2010 Австрија – сребро
2012 Србија – бронза
Медитерански игри
2001 Тунис – злато
* Како член на репрезентацијата на Хрватска, е избран во Ол стар тимот на СП 2009 година
* Како член на репрезентацијата на Хрватска во 2004 година ја доби Државната награда за спорт „Фрањо Бучар“