Манцас: Македонците во Грција да не се плашат и да го одржуваат идентитетот

Нетпрес: Златна Зора беше долго време толерирана од грчката влада. Кога правеа инциденти на границата со Македонија, никој не презеде ништо. Кога беа уништувани македонски возила, повторно не преземаа ништо. Презедоа по убиството на младиот Грк и тука повторно се поставува прашањето колку е искрена заложбата да се расчисти со Златна Зора или тоа е само поради притисокот од меѓународната заедница ?

Манцас:Јас мислам дека се притиснати, повеќе е притисок од меѓународната заедница. На пример, за нас Македонците Златна Зора постоеше од пред многу години, а не од сега. Уште од пред дваесет години кога почна и прашањето со поранешна Југославија. Ние отсекогаш сме имале проблем со нив. Знаете за промоцијата на речникот во Атина, кога Златна Зора влегоа внатре и имаше проблеми. Исто и во Лерин, кога правевме некои свадби или панаѓури со песни и со ора и кога ќе пеевме и ќе игравме, тие постојано доаѓаа и правеа проблеми. И во канцеларијата на Виножито во Лерин влегоа, а никој не прашуваше ништо ниту пак дадоа овде на телевизија.

Нетпрес: Паметам дека за време на изборната кампања, координаторот на Неа Димократиа за Северна Грција изјави дека Златна Зора се нивна сестринска партија и дека се согласуваат за сите поважни прашања, освен за насилството.

Манцас: Па да, тие се десничари и секако дека имаат врска и со Неа Димократиа и со другите што се од десната страна во Парламентот. И на некого му одговараат. Им одговара да постојат за да прават некои работи кои што тие самите отворено не можат да ги направат. Ете затоа ги држеа така, за да можат да го прават тие валкани работи.

Нетпрес: Има ли политичка партија што може да го реши името со Македонија?

Манцас: Зборуваат за една црвена линија, а никој всушност не знае каде е таа црвена линија, каде почнува и каде завршува. Зборуваат за име со географска одредница, а кога ќе дојдат до тоа проблемот на тој начин да се реши, тие потоа ќе додадат нешто друго. Па ќе кажат не постои јазикот. Па и тоа ако се реши, ќе кажат и нешто друго. Ќе кажат сега не постои, не знам, идентитетот. А ако и тоа го решат, после ќе најдат и нешто друго. Бараат некои работи и постапуваат така зошто не сакаат да го решат.

Нетпрес: Што мислите, што е она што реално и пречи на Грција па ни го блокира членството во ЕУ и НАТО. Што е реалниот проблем за нив ?

Манцас: Проблемот е најпрвин дека постојат Македонци и за нив е тоа важен проблем, затоа што ние ги бараме правата кои што ги имаме, за јазикот, за историјата, за песните,за се… И тоа е нешто што им пречи, навистина им пречи.

Нетпрес: Додека во Грција има консензус меѓу сите политички партии како за официјалната црвена линија со Македонија, така и во однос на македонското малцинство, во Македонија состојбата е поинаква. Така од една страна се наоѓа Владата со државната црвена линија зад која преку избори застана и народот. Меѓутоа од друга страна ја имаме македонската опозиција и лидерите на некои опозициски партии кои што даваат изјави од типот дека Македонците треба да си го свиткаат рбетот или дека за партијата било прифатливо сложено име со географска одредница. Љубчо Георгиевски на пример неодамна изјави дека не било ништо драматично ако сме биле Горна или Северна. Освен што ваквите изјави де факто им штетат на македонските позиции во разговорите, мислите ли дека имаат и негативни ефекти врз положбата на македонското малцинство во Грција ?

Манцас:Мислам дека нема некои негативни, ниту пак позитивни ефекти. Ние не се интересираме многу околу тоа што е во Република Македонија, со Груевски или која и да биде друга партија во Република Македонија. Ние живееме тука, имаме свој статус и проблеми и сакаме да ги решиме тие проблеми со нашата Влада. Единствено што бараме се нашите права.

Нетпрес: Во пресудата од Меѓународниот суд на правдата во Хаг, меѓудругото имаше и толкување во врска со оној аргумент што Грција се обиде да го искористи против Македонија, а тоа беше тврдењето дека тоа што Македонската влада се грижи за состојбата на човековите права на македонското малцинство во Грција наводно претставувало мешање во внатрешните работи на Грција. При тоа судот во Хаг беше дециден дека тоа не претставува мешање. Од друга страна пак, македонскиот премиер Никола Груевски беше првиот македонски премиер кој што го покрена ова прашање на високо меѓународно ниво и се обиде да го вметне во пакетот за кој што се разговара во Обединетите Нации. Нели би било подобро и во Македонија да се има една единствена позиција за овие прашања ?

Манцас:Е па да, сигурно дека е најдобро, Владата на државата и сите политички партии од Парламентот да се согласуваат за националните прашања. И подобро е да имаат еден став и да не го менуваат. Тоа е најважно, да не се менува.

Нетпрес: Иднината останува на младите, па ме интересира колку меѓу нашите млади Македонци овде во Грција има интерес за членство и активирање во Виножито ?

Манцас:Низ сите места овде, во Лерин, во Воденско и тука близу во Кукушко, по селата правиме фестивали, панаѓури и такви работи и таму се појавува младината, играат, ги пеат песните и гледаме дека се интересираат. Сега, за политика е малку потешко. Младите не се толку заинтересирани за политички работи.

Нетпрес: Колку се свесни за својот идентитет, колку се интересираат да го зборуваат македонскиот јазик, да се почитува македонската традиција и обичаи ?

Манцас:Епа тоа е малку тешко прашање. Колку сакаат ? Тие сакаат ама сепак постои нешто што пречи а тоа е стравот што го има по нашите места.

Нетпрес: За крај што би сакале да им порачате, особено на Македонците од Грција што го читаат ова интервју?

Манцас:Видете, ние постојано им кажуваме на луѓето да не се плашат. Да не се плашат, да го одржуваат идентитетот, да бараат низ историјата што е и како е, да го зборуваат јазикот, да разговараат со постарите, да бараат која е историјата на селото и на секое место каде што живеат, да ја одржуваат културата, песните, ората и не треба нешто повеќе да направиме.

Нетпрес: Да се одржува идентитетот…

Манцас:Да, да се одржува идентитетот. Ние не бараме некои други работи, за младината и тоа е доволно.

Доколку преземете содржина од оваа страница, во целост сте се согласиле со нејзините Услови за користење.