Мета: Македонската заедница ќе биди застапена во сите државни институции

214

Генералниот секретар на единствената партија на Македонците во Албанија, Македонска алијанса за европска интеграција (МЕАИ), Васил Стерјовски е во кандидатската листа за идни пратеници на Социјалистичкото движење за интеграција во Корча. Парламентарните избори во Албанија ќе се одржат на 25 јуни.

– Благодарение на договорот и соработката со Социјалистичкото движење за интеграција дадена ни е можност да имаме претставник од македонската заедница во Парламентот на Албанија, каде ќе се слушне нашиот глас, истакна Стерјовски на митинг.

Вели дека му е чест што со поддршка на движењето доследно ќе ја претстави и ќе и служи на македонската заедница и на сите граѓани на округот на Корча.

-МАЕИ, како партија која во својата програма има заштита на правата на македонската заедница во Албанија, владеењето на правото и европската интеграција на Албанија ги дели истите вредности со Социјалистичкото движење за интеграција, која е европска партија, сеопфатна и со извонреден придонес во консолидирање на демократијата во земјата, посочи Стерјовски.

На митингот се обрати и Илир Мета, претседателот на државата и поранешен лидер на партијата, кој упати благодарност до МАЕИ што одлучела заедно со нив да настапат на изборите.

– Ова не е случајно, ова не е договор за да се стопи Македонска алијанса. Не. Ова е договор за застапување на прекрасната македонска заедница во сите албански државни институции. Бидејќи, како што рече и Васил, Социјалистичкото движење за интеграција и Македонска алијанса делат заеднички вредности за толеранција, сеопфатност и европската интеграција, истакна Мета.

Вели дека правата на секоја од етничките заедници во Албанија се многу важни и се показател на степенот на демократија и толеранција во општеството.

Мета посочи оти е задоволен што политичката криза во Македонија оди кон нејзиниот крај.

Ефтим Митре од Глобочани, Мала Преспа е уште еден Македонец кој е на листата на оваа партија за Изборната единица во Корча, но како кандидат на Движењето на социјалистичка интеграција.

Доколку преземете содржина од оваа страница, во целост сте се согласиле со нејзините Услови за користење.