Мицкоски: Државата оди кон банкрот, власта мора да најде над 2 милијарди евра за излез од кризата!

Референдумот инициран како одговор на францускиот предлог, енергетската и финансиската криза, политичките цели и амбиции, како и односите во рамки на опозицијата, се дел од темите за кои разговаравме со опозицискиот лидер Христијан Мицкоски. Во интервју за „Фокус“, Мицкоски изразува увереност дека ВМРО-ДПМНЕ ќе ја формира следната влада. Притоа, тој најавува повлекување од политиката, ако макар еден пратеник ја изневери неговата доверба

ФОКУС: Зошто со референдум одлучивте да одговорите на усвојувањето на таканаречениот француски предлог од страна на власта, што предизвика силна политичка поларизација и граѓански протести?

МИЦКОСКИ: Единствениот начин како може опозицијата да дејствува е преку референдумско изјаснување, друг начин не постои. Во современата парламентарна демократија може да спречите нешто само доколку го повикате народот да се произнесе и да даде свој став. Токму од тие причини се одлучивме за задолжителен референдум, а не како што беше со оној манипулативниот за Преспанскиот договор, кога имаше прашање со двојно значење. Референдумот и прашањето се многу прецизни и јасни, се однесуваат на изворот на сите проблеми, а тоа е билатералниот договор со Бугарија.

ФОКУС: Многумина противници на францускиот предлог заговараа борбата да се води преку интензивни протести, па дури и радикализација. Според нив, референдумот е невозможно да успее и ќе ги легитимира политиките на власта.

МИЦКОСКИ: Има и такви, кои претежно се инсталации на власта и имаат цел да заведуваат, а не да помагаат, па повикуваат на радикализација, насилство итн. Современата демократија, таков тип пресметки не познава. Водевме сметка прашањето да биде според Законот и надлежностите на Парламентот, за спикерот да нема изговор дека тоа не е во надлежност на Собранието.

ФОКУС: И во оваа формална иницијатива избегнувате да го користите уставното име. Зошто го правите тоа, со оглед дека веќе соопштивте дека го прифаќате Преспанскиот договор како реалност?

МИЦКОСКИ: Не е така. Законот за ратификација се однесува на Договорот што го потпишала Република Македонија и Република Бугарија, не се однесува на Договорот што го потпишала Република со новата придавка Македонија и Република Бугарија. Референдумското прашање се однесува за тој Закон – Закон за ратификација на Договорот за пријателство, добрососедство и соработка потпишан од Р. Македонија и од Р. Бугарија. Ние не можеме да го менуваме законот како нас ни одговара.

ФОКУС: Сепак, спикерот Талат Џафери одлучи да ја отфрли вашата иницијатива за референдум, не со образложение дека е неуредна, туку дека е противуставна. Како гледате на тоа?

МИЦКОСКИ: Талат Џафери во минатото имал многу улоги, а сега и противправно си ја додаде улогата на Уставен судија. Толкување на Устав е работа единствено на Уставниот суд. Прават правни гимнастики за да избегнат народ. Тоа што бегаат од соочување со народ кажува дека знаат дека ќе има излезност и знаат дека народот е против договорот кој е извор на асимилацијата што СДСМ и Димитар Ковачевски ја спроведуваат.

ВМРО-ДПМНЕ има референдумско прашање со кое не ја менува содржината на договорот, туку го спори законот со кој тој се прогласува за важечки. Бегаат од референдум, но нема да избегаат од следниот изборен пораз, после кој следи одговорност пред законите и Уставот.

ФОКУС: Какви ќе бидам вашите следни чекори? Можно ли е да го напуштите Собранието?

МИЦКОСКИ: Сега, ова не е читанка, па од А до Ш да се каже што ќе биде прв чекор, што втор чекор, но ќе ги заостри односите. Напуштање на Парламентот не доаѓа предвид, зашто тоа е единствениот начин власта да спроведе сè што и одговара. Тие би сакале празни пратенички клупи и да си поминат сè што сакаат. Имаме намера внатре од Парламентот, ваков каков што е, да се бориме да ги спречиме штетните политики на власта.

НЕ СЕ ФАТИВМЕ НА МАМКАТА ЗА РЕФЕРЕНДУМОТ

ФОКУС: Како беше одлучено во референдумското прашање да биде инкорпориран Договорот со Бугарија? Кога претседателот Стево Пендаровски даде идеја тоа да се однесува на членството во ЕУ под условите од францускиот предлог, вие начелно прифативте…

МИЦКОСКИ: Пендаровски излезе со таква изјава, мислејќи дека со тоа еуфорично ќе направи некаков голем политички потег, за потоа, откако виде во каква замка влегува и откако претпоставувам доби укор од менторот, мораше, не малку, туку многу да ретерира, од 0 на 180 степени. Народот може да види каков човек е во таа институција, но претпоставувам има колективна меморија и ако повторно биде поддржан од СДСМ за претседателски кандидат, ќе може народот соодветно да му даде одговор. Моите информации велат дека Ковачевски ќе го поддржи Пендаровски ако дотогаш сѐ уште биде претседател. Но, ќе видиме, таму битката е неизвесна, има и други политичари што амбицираат, сегашни и актуелни…

ФОКУС: Зошто позитивно одговоривте на неговиот првичен предлог, а на крај референдумското прашање излезе поинакво?

МИЦКОСКИ: Нашиот потег беше со цел да го извадиме Пендаровски на површина. Ако ние влезевме во таа замка, тогаш можеше многу лесно Талат Џафери да ја одбие иницијативата, зашто ќе речеше дека ова не е во ингеренции на Собранието, туку во ингеренции на Владата. И, за жал, ќе беше во право. Зашто сега, ако ја спори оваа иницијатива, не е во право, ќе направи политичка гимнастика и насилство зашто договорот со Бугарија е ратификуван од Собранието.

ФОКУС: Одредени правници реагираа дека самиот Договор содржи клаузула дека секогаш една од страните може да го поништи. Ако е така, зошто едноставно не преземете обврска дека ќе го поништите Договорот кога ќе дојдете на власт?

МИЦКОСКИ: Треба да дојдат следните избори и тогаш ќе излеземе со наша позиција ако не се случи референдум или ако референдумот биде неуспешен. Моментално, од позиција на опозиција, тоа ни е единствената алатка што ни стои на располагање за да го напуштиме овој асимилаторски договор. Имаме различни мислења и сите треба да се почитуваат, но ние како политичари избираме легитимни политики.

УСТАВНИТЕ ИЗМЕНИ ОТВОРААТ ПАТ КОН ПРОБЛЕМИ

ФОКУС: Во една пригода, рековте дека очекувате мобилизација и консолидирање на антивладиното расположение, па дали тоа е суштината на референдумот, со цел да се испровоцираат вонредни избори?

МИЦКОСКИ: Нашата намера е да успее референдумот и народот да може да се произнесе дали е за напуштање или за останување во тој договор. Каква и да биде излезноста, без разлика дали власта ќе бојкотира или не, ние под овие околности немаме намера да ги гласаме уставните измени. Овие околности не даваат одговор на нашиот пат кон ЕУ, зашто потоа ќе следат нови околности и нови околности.

ФОКУС: Но, која е смислата сега да се блокира процес на уставни измени, а со тоа и отворањето на поглавјата, откога, условно кажано, најтешкото помина?

МИЦКОСКИ: Не е така. Уставните измени нас ни го отвораат патот кон проблемите. Тогаш, на една маса ќе преговараме за европските стандарди – транспорт, здравство, образование, владеење на правото, а на друга маса за Самоил, Климент, Наум, преродбениците, илинденците… Без разлика што на едната маса ќе ги постигнеме критериумите, ако на другата маса не прифатиме дека во Втората светка војна Бугарите не биле окупатори, туку администратори, бадијала што на првата маса сме се договориле.

ФОКУС: Што, според Вас, сака да постигне Бугарија? Која е нивната крајна цел што треба да се исполни за да нема блокада на нашиот пат кон ЕУ?

МИЦКОСКИ: Да докажат дека имаме бугарски корени како народ, дека македонскиот потекнува од бугарскиот народ, дека комплетно нашата традиција и историја и културно наследство е со бугарска нота. И нашата влада вели дека ако дојдат тие прашања, ние ќе станеме од масата и ќе ги напуштиме преговорите. Тоа е поглупав пристап отколку сега да одиме заедно на референдум, да излеземе од тој договор и повторно да седнеме на маса да преговараме нов договор, во кој нема да има такви замки.

ФОКУС: Но, и владата и од ЕУ уверуваат дека историјата и идентитетот не се и нема да бидат дел од преговорите?

МИЦКОСКИ: Првите документи откако почнавме да преговараме, како што тврдат, е за средниот век и за Самоиловата држава, на Кирил и Методиј и Климент и Наум. Е па, ако не преговараме за историјата, тогаш првиот документ нека биде некој грант од ЕУ милијарда и пол евра за изградба на автопатот од Коридор 8 и 10, наместо државата и овој сиромашен и опљачкан народ да се задолжува за една група политичари.

КАСНО Е ЗА МЕНАЏМЕНТ, СЕГА ТРЕБААТ ПАРИ

ФОКУС: Како го оценувате менаџирањето од страна на власта со економската и енергетската криза, која се продлабочи по војната во Украина? Што можеше да се направи поинаку и подобро?

МИЦКОСКИ: Предупредив уште пред една година дека до тоа ќе дојде и понудив сценарио на излез пред 6-7 месеци. Потоа власта порачуваше дека ја имаат ситуацијата под контрола, дека опозицијата шири дефетизам и дека јас сум покажувал елементарно непознавање. Наместо да се фатат за работа, одлучија мене да ме навредуваат, но направија една работа – тендерите во четири очи. Тоа е суштината. Договараа инстант-фирми денес формирани, утре да добиваат мултимилионски договори за превоз на јаглен. Инстант-фирми добиваа тендери за снабдување со мазут, вршеа ископи во РЕК Битола…

ФОКУС: Српскиот претседател Александар Вучиќ направи јавна презентација, според која, Србија оди кон банкрот ако ги задоволува потребите за струја и гас според денешните цени. Се движиме ли и ние кон такво сценарио?

МИЦКОСКИ: Слично е, и полошо! По мое мислење, ќе требаат од 2 до 2,5 милијарди евра за да излеземе од оваа ситуација, за да ја завршиме оваа и да ја поминеме следната година. Енергетската криза, сама по себе, нема да биде толкав проблем колку што ќе се трансформира во финансиска криза. Струја ќе има да се купи, но по која цена? Колку повеќе чекаме, толку поскапо ќе ја плаќаме. Од тоа што гледам од Владата, не е јасен планот како финансиски ќе ја затворат ситуацијата. Ниту енергетски се обезбедени…

ФОКУС: Пред неколку дена, владина делегација беше во Софија, каде што беше договорен откуп на 200 мегавати струја во текот на зимските месеци.

МИЦКОСКИ: Моите информации се дека и тие 200 мегавати што се договарани им е кажано дека мора да поминат преку берзата, што значи цената е берзанска и не ја гледам привилегијата. Па, пратиле пратеник од тука, кој барал цена – берзата минус 30 проценти. На тоа му се насмеале и го испратиле назад дома. Така што тие 200 мегавати, нема ни половина од потребите на стопанството под идеален услов да работат трите блока на РЕК Битола, да има одлична кондиција со хидроцентралите, да работат двете турбини на ХЕЦ Неготино, да работи Осломеј…

ФОКУС: Дали тоа е реално да се очекува, ако се знае дека има чести падови и ремонти на блоковите, полуиспразнети акумулации…

МИЦКОСКИ: Еве, јас нејќам да бидам адвокат на ѓаволот и нејќам да речам, дај Боже тоа да се случи, зашто ако тоа не се случи, банкротот и катаклизмата ќе дојдат многу побргу. Ние сме лето, а блоковите ни паѓаат како печурки. Есента уште не е дојдена, а замислете зимата кога ќе дојде што ќе се случува.

СЕ ОТВОРИ СПИРАЛАТА, АМА ВО НЕГАТИВНА НАСОКА

ФОКУС: Компаниите кои се на слободниот пазар на електрична енергија се жалат дека со овие цени нема да преживеат и најавуваат клуч на врата. Како може да им се помогне?

МИЦКОСКИ: Треба да се обезбедат пари. Ние не можеме со мерки што ќе ги донесеме да дејствуваме на дневно, неделно или на месечно ниво. Ние сега треба да работиме за следната година, за следната есен и зима. Тоа е суштината во енергетиката, работите нема да се случат преку ноќ, треба да помине време.

Стопанството го оставаме на страна, иако таму работат 680.000 македонски граѓани. Без тоа живо стопанство ќе нема ни државата пари зашто ова стопанство го полни буџетот. Тогаш ќе нема ниту за администрацијата, ниту владата што да краде.

Затоа ние мора сега да се насочиме како да му помогнеме на стопанството. Тие прво велеа 150 милиони, па 300 милиони, јас велам 500 милиони евра, но тоа е само за граѓаните и домаќинствата, без стопанството.

Технички, процесот можеше да се менаџира пред 6-7 месеци, сега тоа може за следната година, но за тоа требаат пари. Треба да најдат начин како да обезбедат пари.

ФОКУС: Пораснаа цените за живот, па природно и синдикатите побараа повисоки плати, имаше и штрајкови во повеќе сектори. Дали треба да се излезе во пресрет на нивните барања, кога сите се согласни дека сме презадолжени, а, како што самиот велите, потребни се нови пари за излез од кризата?

МИЦКОСКИ: Се сеќавате истите синдикати се сликаа со владата, потпишуваа колективни договори, потпишуваа минимална плата. На први мај, сите синдикати во светот протестираат, само нашиот синдикат се гушкаше со министерката за труд и социјала и премиерот и велеше дека постигнале историски договор дека ќе добијат линеарно покачување. И владата ги изигра.

Секогаш треба да се помогне, но треба да ги видиме параметрите, не располагаме со реални параметри. Го гледам буџетот, веќе дефицитот е близу 350 милиони евра. Се најавува ново задолжување зашто в година ни стигнува еврообврзница од 450 милиони евра, значи во моментот ви требаат 800 милиони евра.

Затоа направив еден базен од сите овие инпути и велам дека од 2 до 2 и пол милијарди евра ни требаат во моментот за оваа и за следната година, за некако да ја менаџираме оваа криза.

ФОКУС: Многу производствени комбинати за следниот период најавуваат ремонти, што ќе значи привремено затворање. Какви ќе бидат ефектите од тоа?

МИЦКОСКИ „ФЕНИ“ не работи од 1 јули, „Бучим“ не работи од 1 септември и уште неколку поголеми извозници најавуваат запирање на производствените капацитети. Тоа ќе се одрази на БДП-то во 3-от и во 4-от квартал, а кога ќе се случи тоа, ќе порасне долгот. Кога ќе порасне долгот, ви паѓа кредитниот рејтинг, кога ќе падне кредитниот рејтинг, парите ќе ви станат поскапи и нема да најдете инвеститори што ќе ви позајмат пари.

Тоа е таа спирала во економијата што Зоран Заев и Драган Тевдовски ја споменуваа, ама во негативна насока. Има и позитивна, ама сега сме во негативната насока.

ОРТАЦИ СО КРИМИНАЛОТ И СО КОРУПЦИЈАТА

ФОКУС: Како ја оценувате оваа влада од аспект на борбата против криминалот и корупцијата? Беа отворени истраги за многумина, но впечатокот е дека постапките траат предолго и дека правдата бавно се испорачува.

МИЦКОСКИ: Тие се ортаци со криминалот и со корупцијата. Ова е власта што даваше пасоши на балкански нарко-босови и криминалци, еден од нив сега беше ликвидиран. Имаше пресуди, но судијката имаше едно сведочење дека не ѝ биле сите факти ставени на маса кога ја носела пресудата, и тоа не остана незабележано.

Седат Пекер гостин им беше во државата, со месеци им беше тука, хотел имаше закупено, не знаеше дека се шета во центарот на Скопје со пратеници од коалицијата на СДСМ, или му ги инфилтрираа пратениците за да бидат поблиски. Само да не излезат во јавност што и како тргувале со Пекер.

ФОКУС: Вие во јавноста изнесовте информации за овој случај по што доби некаква разрешница, но отворавте и други афери. Меѓу другото, најавивте дека ќе изнесете детали за милионски криминал во УЈП, но тоа никогаш не го направивте. Зошто?

МИЦКОСКИ: Стоиме на таа најава и рековме дека кога ќе го ослободиме ова судство и обвинителство од оваа окупирана состојба, ќе ги споделиме и деталите и документите за тоа. Тоа оди до највисокото ниво на УЈП, до таму е криминализирано, имаше таму некои смени, рокади во скопското УЈП итн., имаше обиди за гимнастики, но тоа заврши како и сѐ што завршува.

ФОКУС: Каков конечен епилог очекувате во предметот „Талир“, кој се однесува за финансирањето на ВМРО-ДПМНЕ. Според првостепената пресуда, треба да се конфискува партиски имот, но сѐ уште не е правосилна.

МИЦКОСКИ: Во ова октроирано и заробено судство, очекувам сѐ. Но, ние ќе се бориме со сите правни механизми. Ние уште не сме ја добиле пресудата за да може да се жалиме. Нас имотот не нѐ обединува, туку народот, другарството, искреноста, желбата за работа, трудољубивоста, чесноста…

ФОКУС: Токму поради големиот имот, во минатото се залепи етикета за ВМРО-ДПМНЕ како најбогата и најимотна партија во Европа, па дали се чувствувате како лидер на богата партија?

МИЦКОСКИ: Не чувствувам дека се поставува оваа дилема во јавноста, можеби некои кругови ја поставуваат со цел да ги растурат пердувите дека ВМРО-ДПМНЕ е најбогата партија, па јас тие пердуви да ги собирам. Но, одговарам на сите прашања отворено.

Сум се соочил со многу предизвици, еден од нив е да ја консолидирам и ја консолидирав како нејзин претседател. Успеавме по 4 години да ја направиме победничка, на локалните да има историски резултат и на анкетите да има 2 пати поголем рејтинг од СДСМ. Состојбата што тогаш ја затекнав не беше така како што е вашето прашање, туку напротив. Денес можам да кажам дека ВМРО скромно опстојува на финансиски и материјален план.

ДОСТА Е ОД ВИСОКОКАТНИЦИ, НИ ТРЕБААТ ФАБРИКИ

ФОКУС: Дали сте задоволен од градоначалниците и од директорите именувани од вашата партија на локално ниво? Власта ве критикува за истите работи за кои вие ја критикувате на централно ниво, на пример за партиски вработувања.

МИЦКОСКИ: Јас сум презадоволен од градоначалниците на ВМРО-ДПМНЕ, имајќи предвид каква состојба затекнаа и сега во услови на оваа енергетска криза. Сега, дали власта нѐ критикува зашто не покажува докази, тоа е друго, ние зборуваме за сериозен криминал на власта со докази. Неспоредливо е.

ФОКУС: Колку сте задоволен од нивната борба против урбаната мафија? Во таа насока, како го коментирате обвинувањето на довчерашниот коалициски партнер Стевчо Јакимовски дека сте имале некакви интереси од таков тип во Карпош?

МИЦКОСКИ: Стевчо Јакимовски ме обвини дека јас сум бил за да се гради 35-катница во Карпош, јас сум стоел зад познат инвеститор. И добро, советничката група на ВМРО во Карпош го повика градоначалникот заедно да изгласаме поништување на тој ДУП. Поголем доказ дека обвинувањето е лажно – нема. Тој не го прифати тоа и тогаш ја напушти коалицијата.

ФОКУС: Тоа ли беше причината за раскинување на коалициската соработка?

МИЦКОСКИ: Така произлезе. Следен чекор беше тоа што советничката група на ВМРО-ДПМНЕ, заедно со уште една советничка група, изгласа поништување на тој план во Карпош. Ако сум бил со свои интереси, немало тоа да го правам.

Еве јавно кажувам, единствениот интерес ми е развојот на Македонија, не ме интересираат градби и урбанистички планови, ме интересира Македонија да се развива во вистинската насока, да носиме градби во нови фабрики, да се отвораат нови работни места. Такви градби ќе поддржам, но висококатници и облакодери нема да поддржам.

ПАК БИ ПОДДРЖАЛ КОНЦЕПТ ЗА МОДЕРНО СКОПЈЕ

ФОКУС: Поактуелна тема се односите со скопската градоначалничка Данела Арсовска, која последно разреши двајца ваши функционери во локалната самоуправа, а некои сами се повлекоа. Дали тоа значи дефинитивно крај на вашата соработка?

МИЦКОСКИ: Многу е важно да се напомене дека Арсовска е независен кандидат што ВМРО-ДПМНЕ го поддржа и работеше за нејзината победа на локалните избори. Верувавме во концептот за модерно Скопје и тука треба да разграничиме дека е независен кандидат и има право на нејзина политика. Дали ние ќе се согласуваме или не, тоа советничката група во Град Скопје ќе го покаже на дело. Таму каде што ќе видиме политики во насока на проектот за модерно Скопје што сме го поддржале, ќе ја поддржиме, ако заборави некој од тие проекти, тогаш патиштата ни се раздвојуваат.

ФОКУС: Таа го обвини веќе поранешниот директор на „Водовод“ за местење милионски тендер, па му најави и кривична пријава, откако го разреши заедно со генералниот секретар на Градот.

МИЦКОСКИ: Жалам што менаџер како Арсовска не успева да препознае квалитет и да не ги искористи максимално нивните потенцијали. Добро е јавноста да знае дека тоа е капитален проект за изградба на пречистителна станица, скопјани немаат третирање на отпадните води. Финансиери се Светка банка и Европската инвестициска банка. Има голема компонента на грант, од 70 до 75 милиони евра. Владата го подигнува кредитот преку Министерството за животна средина. Јас не знам како може човек толку да е јак, да влијае врз одлуките на двете банки.

ФОКУС: Од што тогаш се мотивирани ваквите обвинувања?

МИЦКОСКИ: Мислам дека заднината на разрешувањето е нешто друго, но времето ќе покаже. Најодговорно тврдам, многу тешко ќе најдете човек во Македонија што ќе може да влијае врз одлуките, посебно на вака голем проект на вакви финансиери. Тоа сигурно не е Перински, кој успеа за 58 милиони денари да ја зголеми наплатата без да ја зголеми цената на водата, успеа да прокнижи поголема добивка од неговиот претходник.

Единствено нешто што можам да посакам како скопјанец, е успех во работата на Арсовска како градоначалник, проектите што ги ветила да ги реализира.

ФОКУС: Дали сметате дека згрешивте со поддршката за Арсовска?

МИЦКОСКИ: Јас и денес ако го имам концептот за модерно Скопје на маса и оние проекти, ќе го поддржам. Но, сѐ што е надвор од тоа, ќе бидеме жестоки критичари и жестока опозиција.

НАША ЦЕЛ Е 61 ПРАТЕНИК, НО СЕКАКО ПРАВИМЕ ВЛАДА

ФОКУС: Пред да бидете избран за лидер на ВМРО-ДПМНЕ, говоревте дека новиот лидер треба да исполнува неколку услови, меѓу кои да обезбедува коалициски потенцијал. Вие првите два изборни циклуса практично ги загубивте против поголема коалиција, а сега дозволувате дополнително да се расцепкува вашата коалиција.

МИЦКОСКИ: Одговорот на сите овие дилеми е историската победа на локалните избори. Ако не било така, немало да се случи победата. Партијата се консолидираше 3 години. Победата на локалните избори покажа дека ВМРО е консолидирана и најголема партија и сигурно води кон формирање нова влада. Денес сите анкети покажуваат сериозна разлика, некаде двојно поголема кон СДСМ. И одговорот на прашањето дали сум задоволен е да. Дали можело подобро, секако дека можело.

ФОКУС: Исто така, вашето позиционирање околу францускиот предлог ги натера и албанските опозициски партии да се дистанцираат од вас.

МИЦКОСКИ: Не мислам дека губиме коалициски потенцијал, за сѐ во животот и посебно во политиката постои голема математика. Може нешто ќе изгубите за да добиете повеќе. Ценам дека недоразбирањата што произлегоа од поинакви амбиции со претседателот на ГРОМ не значи дека ние гласачите на ГРОМ сме ги изгубиле. Тие се проопозициски и голем дел од нив на следните избори ќе го поддржат ВМРО-ДПМНЕ.

ФОКУС: Дали сте уверен дека ВМРО-ДПМНЕ ќе биде во позиција да формира влада ако самостојно не освои 61 пратеник?

МИЦКОСКИ: Да, уверен сум, но нашата цел е 61 пратеник!

ФОКУС: По неуспешниот обид за изгласување недоверба на владата, имавте изјава дека човек треба да се праша дали вреди да учествува во политиката. Сега, велите дека ќе се повлечете ако макар еден ваш пратеник поддржи уставни измени. Не сметате ли дека ја предизвикувате политичката судбина?

МИЦКОСКИ: Кога беше гласањето на доверба и недоверба, тоа беше мачно за желудникот, владата сама себе не се брани. Пратениците на власта не беа во парламентарните клупи. Дури, оној силен спикер Џафери, кој затвора собраниски врати и држи внатре пратеници, ја напуштил зашто добил таква наредба. Видовте како покорно напушти за да не направи кворум. Уште потрагично е што беше киднапиран пратеник, на брутален начин.

Ако пратениците веруваат дека оваа влада води исправни политики, тогаш ќе седат и ќе се борат за тоа. Тие луѓе се двојно понижени. Владата и лидерите што ја водат, не им веруваа, па мораа да ги држат во собраниски канцеларии. И тие мртви ладни се вратија во клупите, креваат два прста. Но, сега ги гледаме привилегиите, се легализираат дивоградби. Не сум навикнат на тој начин.

ФОКУС: Ако неколку пратеници на ВМРО-ДПМНЕ го поддржаа Преспанскиот договор, не ли е можно барем еден да поддржи уставни измени?

МИЦКОСКИ: Верувам во пратениците. Ако некој, иако во моментот не гледам таков, ја изневери мојата доверба, тоа значи дека јас не сум човек кој знае да направи правилен избор, значи дека сум погрешил. И ако јас велам дека грешките треба да се санкционираат, тогаш зошто да барам изговор за мојата грешка. Во животот не смее да имате двојни стандарди.

РАМКА 1
ФОКУС: Како ги толкувате последните рокади и поместувања во правосудството и суспензијата на Вилма Русковска? Во нејзино време се гонеа активни функционери на власта, но и за функционери и блиски луѓе до ВМРО-ДПМНЕ.

МИЦКОСКИ: Има многу шпекулации дека Вилма Русковска е променета зашто требало да го уапси овој или оној владин функционер, но не би се занимавал со овие шпекулации. Времето ќе покаже. Јас не сум обвинител, ниту судија, треба да го оставиме да биде независно обвинителството и судството, суштината на демократијата е да имаме различни владеења и треба да ги ослободиме обвинителите и судиите. Мојата порака е да обвинуваат и судат по закон и да не дозволат да бидат заробени од страна на политичарите и од други извори на ноќ, често тука знае да се вклучи и некој од бизнисмените.

РАМКА 2
ВРЕМЕ Е ДУИ ДА ПОМИНЕ ЕДЕН МАНДАТ ВО ОПОЗИЦИЈА

ФОКУС: Сѐ уште ли стоите на ставот дека ја преферирате албанската опозиција за коалициски партнер наспроти ДУИ?

МИЦКОСКИ: Дојдено е време кога на ДУИ ѝ е потребно да помине еден изборен циклус во опозиција. Предолго е на власт, 20 години е период што може да ве контаминира, компромитира и корумпира. Добро е за внатрешна катарза за една партија да помине барем еден циклус во опозиција, тоа е здраво за таа партија и на следните избори тоа време ќе дојде. Ете, да видиме со каков капацитет и потенцијал располагаат од албанската опозиција. На изборите во Тетово, каде што ВМРО го победи СДСМ 2 спрема 1, Беса го победи ДУИ.

Доколку преземете содржина од оваа страница, во целост сте се согласиле со нејзините Услови за користење.