Лидерот на ВМРО-ДПМНЕ, Христијан Мицкоски, денес го оствари своето право на глас и изрази убедување дека Македонија во неделата ќе ја добие првата жена шеф на државата, односно оти верува во победата на опозициската кандидатка Гордана Силајновска Давкова.
По пет недели кампања, по поминати повеќе од 13.000 километри низ Македонија, можам да заклучам дека денес е денот кога граѓаните треба гласно да зборуваат, со пенкалото во рака, позади гласачката кутија. Дали се за ова секојдневие кое што денеска, за жал, е власт во Република Македонија, предводена од Заев Зоран или пак сето она кое ние во изминатиов период го зборуваме, а тоа е правдата која што треба да ја победи целокупната неправда која што денеска се случува во Република Македонија, рече тој.
Мицкоски посочи дека ова е свечен ден и покрај сите неправилности и нерегуларности за кои дознаваат од терен.
Очигледно е дека карактерот на властодршците на Зоран Заев не мирува, сакаат на насилен пат да се избере претседател во Република Македонија. Покрај сите притисоци, злоупотреби, покрај сето она кое се случуваше изминативе денови, особено полициската опсада која беше реалност во Охрид и Ново Село, ВМРО-ДПМНЕ и Гордана Силјановска Давкова ќе победат денеска и Македонија денес ќе ја добие првата жена за претседател, порача Мицкоски.
