Милошоски: На Османи побитна му беше номинацијата на Теута Арифи за амбасадор, отколку да изнајде пријатели во ЕП кои би се заложиле барањата на Бугарија да не бидат дел од оваа резолуција

Мислам дека и во минатото имало обиди на други земји членки, еве конкретно на Грција кога се носеле резолуции за Македонија во Европскиот парламент да се наметне нивното барање во тие резолуции на парламентот во Стразбур, но ЕП секогаш бил, иако можеби најмалку одлучувачки во носењето на битни стратешки потези секогаш, најпријателски расположен кон земјите кандидати вклучително и кон Македонија и ЕП не дозволувал дополнителни условувања особено не со билатерални прашања, потсети Антонијо Милошоски, пратеник и член на Извршниот комитет на ВМРО-ДПМНЕ во гостување во емисија на 24 телевизија.

Милошоски додаде дека ова што сега се случува со Македонија и Бугарија, се случува првпат во Европскиот парламент, а тоа значи дека ваквиот исход на резолуцијата во ЕП може да се објасни со две работи – прво, намалено расположение кај самите земји членки за проширувањето и, второ, намалена активност на македонската дипломатија.

„Јас можам да посведочам дека ние и како пратеници претходно во било кој претходен состав но и како дипломатија секогаш кога се подготвувале резолуции тоа не е резолуција од денес-за утре, тоа е резолуција којашто се подготвува неколку месеци. И на дипломатијата е да ги најде своите пријатели помеѓу пратениците, кај различни пратенички групи во ЕП и да гледа резолуцијата да биде што поповолна и да нема вакви неповолни условувања како во оваа резолуција. И сметам дека тоа потфрлање на активноста на министерот Бујар Османи, на којшто му беше побитно да номинира за амбасадор во Брисел, својата колешка сопартијка, која што за жал доживеавме за првпат од ЕУ да имаме и одбивање и неприфаќање на една номинација на госпоѓата Теута Арифи, наместо да ја посвети енергијата на наоѓање на повеќе пријатели во ЕП, пратеници кои што би се заложиле ваквите еднострани би рекол барања на Бугарија да не бидат дел оваа резолуција“, рече Милошоски.

Посочи дека ако продолжи ваквиот притисок од страна на Бугарија и од друга страна сервилноста на македонската дипломатија, тогаш тоа може резултира и со исход капитулација на преговарачката рамка.

„Ние предупредувавме уште во јули 2017-та година кога се потпишуваше договорот за добрососедство со соседна Република Бугарија. Имавме и затворена седница на Комисијата за надворешни прашања на која што учествуваше тогашниот премиер и преставници од МНР и рековме дека не треба да се брза со потпишувањето на тој договор бидејќи самиот во себе содржи многу неквалитетни формулации на штета на Македонија“, истакна Милошоски.

Укажа на тоа дека формулациите од Договорот за добрососедство меѓу Скопје и Софија денес се злоупотребуваат.

Доколку преземете содржина од оваа страница, во целост сте се согласиле со нејзините Услови за користење.