Милошоски: Заев е фатен во уште една лага, немал средба со Порошенко

75

Пратеникот на ВМРО-ДПМНЕ, Антонијо Милошоски, кој разговорите на македонскиот премиер со руските пранкери кои се претставиле како поранешниот украински претседател Петро Порошенко и генералниот секретар на НАТО, Јенс Столтенберг ги нарече дипломатски скандал, во средата посочува дека премиерот Зоран Заев во своите вчерашни објаснувања и оправдувања дал нови неточни информации.

Како што денеска на социјалните мрежи пишува поранешниот министер за надворешни работи, премиерот Заев не остварил средба со Порошенко во Давос на економскиот форум во јануари годинава, бидејќи нивната средба не била спомената во официјалните владини сооопштенија.

„Дека премиерот Заев немал средба со украинскиот претседател Порошенко на економскиот Форум во Давос во јануари 2019 година потврдено ми е и од релевантни извори во македонското Министерство за надворешни работи. Доколку Заев навистина се беше сретнал со Порошенко во Давос, сигурно и ќе му се пофалел за долгиот телефонски разговор на Whatsapp од пред  шест месеци, ќе дознаел дека тоа е местенка, и барем следните два компромитирачки телефонски разговори немало да се случат“ , пишува Милошоски.

Премиерот Заев, кој е најновата жртва на руското дуо, вчера кажа дека станува збор за добро организирани структури за ширење влијание на трети страни и дека провокациите доаѓаат од медиуми со антинато ставови. Рече и дека е жртва на сопствената отвореност и постојана достапност, а и самиот потсети дека тоа им се случило на многу други политичари.

Доколку преземете содржина од оваа страница, во целост сте се согласиле со нејзините Услови за користење.