Иако отстутвуваат капиталните инвестиции нема, Владата продолжува редовно да се задолжува на домашниот пазар, а за денеска Министерството за финансии закажа аукција на хартии од вредност, со којашто планира да повлече нови 3,55 милијарди денари односно околу 58 милиони евра.
Владата на почетокот на оваа година се задолжи со еврообврзница од половина милијарда евра за која само по основ на камати треба да се платат 96 милиони евра.
Истовремено расте и јавниот долг. Вкупниот јавен долг на Македонија на крајот на вториот квартал од 2018 година изнесува 48,8 отсто од бруто домашниот производ (БДП), што претставува зголемување за 0,6 процентен поен. во однос на претходниот квартал, покажуваат најновите податоци на Народната банка.
Со забелешка за јавниот долг се произнесе и Меѓународниот монетарен фонд (ММФ) во последниот извештај за фискална транспарентност. Оттаму велат дека јавниот долг се зголемува и без да има потреба од финансирање на буџетскиот дефицит, а тоа не е прецизно наведено во државните финансиски извештаи.
Во заклучоците стои дека Македонија вложила напори за подобрување на своите практики за фискална транспарентност и дека е постигнат напредок на тоа поле. Сепак , од ММФ даваат низа препораки за зголемување на јасноста во планирањето и трошењето на јавните финансии.
„Разликите во клучните фискални агрегати меѓу извештаите на државата и статистичките извештаи не се објаснети и ниеден извештај не објаснува како промената на државниот долг може да не се доведе во врска со буџетскиот дефицит, што е важно со оглед на тоа што во неколку години имало значајни промени во долгот што произлегоа од други фактори, а не само од потребите за финансирање на дефицитот, стои во извештајот на ММФ.
