Високата претставничка за надворешна политика на ЕУ во заминување, Федерика Могерини, не ги коментира политичките промени во нејзината земја, Италија.
Со најавата за формирање на нова владина коалиција во Италија помеѓу Движењето пет ѕвезди и Демократската партија, на која и припаѓа Федерика Могерини, се поставува прашањето дали таа би можела да добие повторно функција во идниот состав на европските институции, најверојатно Европската Комисија.
Италија е единствената земја која сѐ уште не назначила европски комесар, токму поради политичката криза, и сѐ почести се гласините во Брисел дека Могерини би можела да ја добие номинацијата.
Шефицата на европската дипломатија, која овие два дена претседава со неформалниот Совет за министри за надворешни работи во Хелсинки, денеска се воздржа од секаков коментар.
-Знаете дека никогаш не коментирам внатрешна политика на земјите членки на ЕУ, вклучително и на мојата земја, јас не застапувам партија, туку сум висока претставничка за надворешна политика на ЕУ, и нема да направам исклучок овој пат, но можам да кажам дека ова е навистина важен момент за италијанската политика, одговори Могерини на новинарско прашање дали очекува да биде назначена за еврокомесарка од новата италијанска влада.
Во 2014-та, Могерини беше избор на тогашната влада составена од Демократската партија на Италија, која во меѓувреме изгуби избори во корист на екстремната десница на Матео Салвини и Движењето пет ѕвезди.
