Министерството за надворешни работи на Русија соопшти дека Москва е загрижена од зголемениот потенцијал за конфликт во Персискиот Залив, велејќи дека, по се изгледа, САД бараат повод за војна.
Минатата недела Русија го претстави пред странските дипломати во Москва својот нов концепт за безбедност во Заливот како одговор на растечките глобални тензии во близина на регионот.
– Добиваме впечаток дека Вашингтон едноставно бара изговор за ескалација на тензиите и за продолжување на својата агресивна реторика против Иран, по што би преминале во поактивна фаза на конфликтот, рече портпаролката на Министерството за надворешни работи Марија Захарова.
Според неа, настаните во регионот „навистина се движат до опасна точка и постои ризик од голем воен судир“.
– Ситуацијата се приближува до црвената линија, оцени Захарова.
Тензиите меѓу САД и Иран се на многу високо ниво од соборувањето на американскиот дрон, а потоа со запленувањето на иранскиот танкер со нафта кај Гибралтар.
