Москва: Шведска и Финска ги чека одмазда

Влезот на Шведска и Финска во НАТО е нивен избор, но тие земји мора да разберат какви последици ќе има тоа врз нивните врски со Русија, изјави Леонид Слуцки.

Лидерот на Либерално-демократската партија на Русија и претседател на комитетот за меѓународни прашања на Руската државна дума на каналот Телеграм изјави дека Северноатлантската алијанса предводена од САД, постојано се обидува да се приближи до границите на Русија.

„За Русија проширувањето на НАТО на исток не започна со алијансата која ги покани Шведска и Финска да се приклучат, туку со прекршување на ветувањата што некогаш му беа дадени на Советскиот Сојуз“, рече претседателот на комитетот за меѓународни прашања.

Слуцки рече дека оттогаш имало неколку такви бранови, кои повремено предизвикуваат нова загриженост за обезбедување безбедност на националните интереси за Русија.

„Да бев на местото на Турција немаше да бидам премногу занесен од гаранциите што ги добија во замена да не ставаат вето на влезот на Финците и Швеѓаните во НАТО. На Горбачов исто така еднаш му беше ветено нешто“, рече Леонид Слуцки.

Турскиот претседател Реџеп Таип Ердоган, финскиот претседател Саули Ниинисто, шведската премиерка Магдалена Андерсон и генералниот секретар на НАТО Јенс Столтенберг одржаа разговори вчера во Мадрид.

Како резултат на тоа, Турција го повлече своето вето, а потоа трите страни потпишаа меморандум со кој се отвора патот на Шведска и Финска да влезат во НАТО. За возврат, забраната за продажба на оружје на Анкара беше укината и страните ветија дека ќе се борат против тероризмот, според ТАСС.

Доколку преземете содржина од оваа страница, во целост сте се согласиле со нејзините Услови за користење.