МВР призна дека е украдена марихуана од полициска станица

За кражбата на 24 стебла марихуана и туфки подготвени за вештачење, од канцеларија на криминалистичка техника во гевгелиската полиција, Нетпрес доби и официјална потврда од Министерството за внатрешни работи.

Оттаму посочија дека заедно со Јавно обвинителство се преземаат мерки за разрешување на случајот.

„Од досега преземените мерки и активности, констатирано е дека ноќта на 29.11.2020 е извршена провална кражба во ОВР Гевгелија, во просториите кои ги користи крим техника, кои се со посебен влез во објектот. МВР располага со оперативни сознанија за сторителот и во координација со ОЈО Гевгелија се преземаат мерки за расчистување на случајот. Во врска со овој случај, Одделот за внатрешна контрола веднаш ги изврши потребните проверки и констатира несоодветно постапување на полициски службеник што бил задолжен за обезбедување на просторијата. Против одговорните ќе бидат преземени соодветни мерки“, стои во одговорот на МВР.

Доколку преземете содржина од оваа страница, во целост сте се согласиле со нејзините Услови за користење.