Тестовите кои ги користи приватната клиника „Систина“ се различен тип од тестовите на сите останати институции, тие тестови го детектираат присуството на антитела на вирусот Covid-19, додека останатите тестови го детектираат директното присуство на самиот вирус, реагираше во средата вечерта Министерството за здравство на информациите дека денеска во споменатата приватна здравствена установа 54 од извршените тестови биле позитивни на вирусот.
Претходно беше објавено дека денеска во Клиничката болница „Аџибадем Систина“, со таканаречените брзи серумски тестови од холандско производство, биле тестирани 327 луѓе, од кои дури 54 се позитивни.
„Тестовите кои ги користи приватната клиника Систина се различен тип од тестовите на сите останати институции. Имено, тие тестови го детектираат присуството на анти тела на вирусот Ковид-19, додека останатите тестови го детектираат директното присуство на самиот вирус. За позитивни се сметаат оние пациенти кои се позитивни на вирусот и исклучиво тие се водат и внесуваат во дневната статистика“, се вели во соопштението на Минситерството за здравств.
Од таму посочуваат и дека сите пациенти кои се детектираат како позитивни на тестовите на антитела кои ги прави „Систина“, задолжително треба да направат тест за присуство на вирусот во Институтот за јавно здравство, согласно одлуката на Комисијата за заразни болести во министерството.
