Најавена кривична за Жерновски и Општина Центар

Деведесет и девет отсто од потребните услови за претстојниот Куп на УЕФА се исполнети или се во завршна фаза. Арената „Филип Втори“ е подготвена и ја доби оценката „добар“, но до 8 август кога манифестацијата треба да се одржи, сме во состојба да ги подигнеме условите уште едно ниво повисоко, рече во четвртокот иректорот на АД за изградба и стопанисување со станбен и деловен простор (ПУИГ) Цветко Грозданов, отрфлајќи ги како шпекулации и неосновани обвинувањата од градоначалникот на општина Центар, Андреј Жерновски, дека на Арената се вршат незаконски дејства и дека одржувањето на Купот е доведен во прашање.

Цветков на прес-конференција најави дека ќе поднесе кривична пријава против Жерновски и општината Центар зашто го довеле, како што нагласи, ПУИГ и него како менаџер во заблуда. Најпрво му издале одобрение за градба на земјиштето во рамки на Арената каде што треба да бидат поставени возилата за пренос на Купот, односно за медиумите, а потоа, по два месеца, се прогласиле за ненадлежни, поништувајќи го претходно издаденото одобрение.

„Ги уверувам граѓаните дека одржувањето на Купот на УЕФА ќе се одржи и во ниту еден случај нема да биде доведен во прашање. Ништо нема да нé поколеба да го завршиме проектот, независно дали нашата институција ќе има дополнителни трошоци или какви и да се финансиски импликации кон изведувачот“, рече Грозданов.

Подготовката на земјиштето на коешто, според првичниот проект требало да има тениски терени, е 70 отсто завршена, но сега откако општина Центар го повлече одобрението за градба, тоа ќе биде само израмнето, бидејќи, како што објасни Грозданов, и онака веќе ги исполнува условите за потребната цврстина што ја бара УЕФА.

Директорот на ПУИГ информираше дека се бараат алтернативни решенија со цел целата оваа градежна активност да биде во законски рамки.

„ПУИГ ќе се обрати до Државниот градежен инспекторат за да го врати земјиштето во првобитна состојба и, наместо тениски игралишта со тврда подлога, да биде само израмнето“, додаде Грозданов.

Кривичната пријава против Жерновски и општина Центар ќе биде поднесена идната седмица.

Грозданов на прес-конференцијата апелираше градоначалникот да се надмине себеси и да не ги гледа теснопартиските интереси зашто, како што рече, Купот на УЕФА е манифестација од значење за целата држава.

Според директорот на ПУИГ, целта на обвинувањата на Жерновски објавени изминатите два дена во одредени медиуми била да се оцрни работењето на Агенцијата и да се укаже на нејзината наводна неажурност, што е сосема спротивно од вистината.

Доколку преземете содржина од оваа страница, во целост сте се согласиле со нејзините Услови за користење.