Во продажба е новиот албум „Greatest Hits Collection“ на виртуозот на гитара Влатко Стефановски – колекција составена од неговите најголеми хитови во издание на Croatia records.
– Пресек на исклучително успешната соло-кариера на еден од најголемите гитаристи на нашите простори веќе е достапен на „Greatest hits collection“, во издание на Croatia Records. Компилацијата ја отвора темата „Cowboys & Indians“ од истоимениот студиски албум од 1994 година, по која одат „Кандилце“ и „Сараево“. Приказната хронолошки продолжува со еден од најголемите хитови на Влатко, песната „Џипси сонг“, а потоа следат хитовите „Калајџиско оро“, „Влатково оро“ и „Глуво доба“ од ценетиот албум „Влатко Стефановски Трио“ – соопштија од Croatia record.
Освен наведеното, изданието вклучува и песни од албумите „Кула од карти“, „Thunder From the Blue Sky“ и „Сеир“, а неизбежен дел од наследството на Стефановски се и песните „Бистра вода“ и „Успаванка за Радмилу М.” од незаборавниот акустичен албум „Мајчин јазик“. Компилацијата завршува со „Funky Junkie“ и „Огледало“ од актуелното студиско издание „Taftalidze Shuffle“.
– Овој избор на моите најголеми хитови од соло-кариерата доаѓа на иницијатива на Croatia Records и е дел од нивниот познат серијал The Greatest Hits Collection. Заедно одбравме 17 песни кои се најдоа на компакт-дискот, а на пролет се очекува и двоен винил. Изборот претставува пресек на се она што самостојно сум го работел од албумот Cowboys & Indians во 1994 година, до Taftalidze Shuffle 2020. Мислам дека направивме добар избор, преку кој фановите ќе се потсетат на сите изминати 26 години, кој може да претставува и поттик за секој што сака повторно да им се врати на песните и албумите кои настанале во изминатиот четврт век. Ако нешто сме пропуштиле, оставаме можност за некоја следна компилација – вели за оваа колекција, Влатко Стефановски.
Насловната страница на компилацијата „Greatest Hits“, ја дизајнираше Иво Т. Монтина, а истата ја разубавува фотографијата на Стефан Рајхл. Во внатрешниот омот има и три концертни фотографии на Жељка Димиќ.
– Ненадминатата техника и уникатниот сензибилитет на Влатко беа подеднакво успешни во етно и рок, но и во блуз, фанк и џез – жанрови кои го обликуваа неговиот музички пат и го обележаа како уметник, а самата компилација, која содржи 17 песни, вечно ќе потсетува на неговата кантавторска умешност и исклучителна виртуозност – се наведува во соопштението.
