Објавена „Визуелна хроника на македонскиот стрип: 2000-2007“ од СЦМ

299

Стрип центарот на Македонија со седиште во Велес деновиве го објави вториот том на „Визуелна хроника на македонскиот стрип“.

Енциклопедиското издание е објавено со поддршка на Министерството за култура, а автор е стрип-хроничарот и сценарист Александар Стеванов од Штип. Тој воедно се потпишува и како негов графички уредник.

„Продолжувајќи ја иницијативата за прибележување на домашното стрип-творештво и издаваштво, во книгата Стеванов го обработува периодот 2000 – 2007. А, наспроти мнението за домашната деветта уметност како непостоечка, во неа по хронолошки редослед се опфатени над 200 одредници поврзани со македонскиот стрип: публикации, изложби, работилници, фестивали“, соопшти Стрип центарот.

Оттаму посочуваат дека за да се избегне сувопарност на материјалот, во публикацијата се пренесени стотина цитати и мноштво илустрации. За олеснување на работата на некои идни истражувачи, на нејзините последни страници уредно се поместени ендноти кои реферираат кон други изданија (весници, списанија, книги, каталози) и мрежни места, како и регистар на најчесто користените термини.

„Исто како и претходниот том, кој го опфаќаше периодот 1990 – 1999, и овој е со формат А4 и има 60 страници печатени во боја. Илустрацијата од насловната страница на изданието е фрагмент од стрип изработен од уметникот Синиша Цветковски. До крајот на годината, во авторство на Стеванов се очекува да излезе уште една публикација посветена на македонскиот стрип“, информира Стрип центарот.

Доколку преземете содржина од оваа страница, во целост сте се согласиле со нејзините Услови за користење.