Најмалку 5о разни видови на пиштоли и револвери биле украдени од продавница за оружје во скопската населба Капиштец, информира МВР.
Не се знае точниот период кога била ограбена продавницата. Според полицијата кражбата се случила меѓу 14 часот на 11 ноември и 09 часот на 13 ноември, годинава. Истражните полициски органи утврдиле дека засгеа непознат крадец провалил во продавницата на улицата Васил Ѓоргов во трговскиот центар Капиштец. Полицијата претпоставува дека провалникот со себе носел скали со кои успеал да се искачи до прозорец во продавницата висок околу 6-7 метри. Потоа со алат го скинал катанецот од решетката, која го заштитувала прозорецот, па насилно го отворил прозорецот и успеал да влезе во продавницата на комапнијата „Интерспорт“. Од полиците, на кои имало изложено оружје, провалникот зел околу 50 пиштоли и револвери, од различни производители и калибар. Откако го собрал пленот, крадецот повторно преку прозорецот го напуштил објектот и побегнал без да биде забележан од никого.
МВР не соопштува колкава е штетата во овваа провална кражба, односно колкава е вредноста на украденото оружје.
Најверојатно украдените пиштоли и револвери ќе завршат на црниот пазар, и тоа по многу ниски цени, бидејќи евентуалните купци знаат дека неможат да ги легализираат затоа што секое парче од нив има сериски број.
Но, не се исклучува ниту можноста оружјето да биде искористено во извршување на кривични дела.
