Околу 90 отсто од дебарските јагниња извезени на италијанскиот пазар

Дебарското јагне е речиси распродадено, а цената викендов достигнала 190 денари.
Околу 90 отсто од дебарските јагниња годинава ќе завршат на италијанскиот пазар. Досега се извезени вкупно 15.000 што е 70 отсто од вкупниот фонд во Дебар и Центар Жупа. Дел од пласманот е реализиран и во Хрватска, а нешто е продадено и во Грција и Бугарија, вели за МИА претседателот на здружението на сточари „Даши“, Скендер Аме.

Како што вели Аме, извозот почнал лошо, со ниска откупна цена, но сега е нешто подобар.

-Околу 90 отсто од јагнињата се извезоа во Италија. Откупот почна лошо. Првите 50 отсто од количините ги продадовме по 160 денари за килограм жива мера. Сега ситуацијата е малку подобра. Цената достигна 185 денари, а за викендов и 190 денари. Нема јагне, затоа се зголемува цената, истакнува Аме.

Тој смета дека реалната цена на јагнето треба да биде најмалку 250 денари за килограм.

-Добиточната храна е поскапена, пченката за 100 отсто,а луцерката за 120 – 130 отсто. Двојно зголемена е и цената на репроматеријалите. Лани килограм пченка беше 10 – 11 денари, а сега е 22 денари. Кантите за сирење чинеа 75 денари, сега се 170 денари. Една овца бара килограм пченка, а едно јагне 500 грама, објаснува тој.

Според него, сточарите не ги добиваат субвенциите навреме, а кубурат и со работна сила, посебно со овчари, иако платата е 500 – 800 евра. Се намалува и сточниот фонд. Лани во земјава имало 700 000 овци, сега се 100.000 помалку.

-Никој не сака да биде овчар. Повеќето што досега работеа кај нас, заминаа за Германија. Се намалува и бројот на овците. Годинава има 100.000 помалку или 600.000 вкупно, а лани беа 700.000. Две години доцнеа субвенциите. Во 2022-ра земавме субвенции за 2020 година, но не сме добиле за 2021 година, вели Аме.

Ситуацијата со овчото сирење е релативно добра, пласман секогаш има. Годинава, оценува Аме, цената ќе биде повисока, околу 400 денари за килограм, додека лани беше 300 денари.

-Под 400 денари не треба да биде зашто не ќе можеме да ги покриеме трошоците. Кравјото индустриско сирење е 300 денари, а нашето е традиционално, овчо, со 50 отсто подобар квалитет, потенцира Аме.

Во 2021 година цената на дебарското јагне беше 135 до 140 денари за килограм жива мера.

Доколку преземете содржина од оваа страница, во целост сте се согласиле со нејзините Услови за користење.