Оклопни транспортери, водени топови, борни коли и возила попладнево се упатија кон Собранието на Република Македонија каде за вечерва во 20.00 часот е најавен протест на младинските организации, заедно со навивачката група „Комити“, објави Република.
Четири колони со по десетина возила го блокираа булеварот „Партизанска“, со вкучени сирени, движејќи се кон Собранието.
За вечерва се очекува масовен протест против договорот со Грција кој го потпиша Зоран Заев и Никола Димитров.
На вечерашниот протест не смее да се дозволи да има луѓе со фантомки на главите, порачуваат организаторите од студентското движење „Млади за Македонија“. На социјалните мрежи тие ги повикаа граѓаните ако забележат лице со фантомка, да му ја симнат и да го предадат на полиција.
„Кружат информации дека на денешниот протест ќе има инфилтрирани провокатори со фантомки, кои имаат за цел да ја нападнат полицијата и да предизвикаат немири. Со тоа и да нанесат штета на одбраната на името. Ве повикуваме сите вие на секој оној кој има фантомка да му ја отстраните фантомката и лицето да го предадете на полицијата. Исто така, со мобилните камери снимајте ги сите лица кои се провокатори, важно е да биде отстранета фантомката за да се знае кој ги прави провокациите. Сите кои доаѓаат со фантомки се дојдени за да направат инцидент и затоа не смее да се дозволи луѓе со фантомки воопшто да бидат присутни на протестот“, повикаа „Млади за Македонија“.
Тие нагласуваат дека по никоја цена не се дозволени напади на полицијата. „Полицајците се наши браќа кои го даваат животот за нашата татковина Македонија. По никоја цена не смее да се дозволи напади на полицијата, а ние се оградуваме од секаков вид на насилство. Ве повикуваме сите вие да се воздржите од насилство и да превенирате насилство. Ние се оградуваме од секој вид на насилство, говор на омраза или недолично однесување“, напишаа организаторите на социјалните мрежи.
Протестот за одбрана на името на државата е предвидено да почне во 20 часот пред Собранието на Република Македонија. Веќе е поставена бина за говорниците на тротоарот во паркот „Жена – борец“.
