Османи: Вашингтон не дозволува повреда на суверенитот на Косово во договорот со Србија

Косовската претседателка, Вјоса Османи вели дека администрацијата на американскиот претседател Џо Бајден уште еднаш го повторила ставот дека дијалогот меѓу Приштина и Белград за нормализација на односите треба да се концентрира на меѓусебното признавање на двете држави.

Во нејзиното обраќање пред новинарите по враќањето од САД, каде што престојуваше заедно со премиерот Албин Курти, Османи информира за нивната средба со државниот секретар Ентони Блинкен, кој, како што рече, повторно потврди дека Вашингтон нема да дозволи повреда на суверенитетот на Косово во договорот со Србија.

„Одново е потврдено дека процесот (на преговори со Србија) треба да се концентрира на меѓусебното признавање и ние ги изразивме нашите ставови и го информриравме како стоиме, на пример со договорот за електрична енергија, во фаза на имплементација и за други прашања. Одново е потврден американскит став дека никако нема да турка напред некое прашање кое би го повредило суверенитот и уставниот поредок на Косово“, рече Османи.

Додаде дека на средбата со Блинкен станало збор и за евентуални нови признавања на косовската независност и за зачленување на Косово во меѓународни организации, меѓу другото и за наредните чекори за зачленување во Партнерството за мир на НАТО.

Одговарајќи на новинарско прашање, Османи рече дека со американскиот државен секретар не разговарале за иницијативата Отворен Балкан.

„Што се однесува до Отворен Балкан, на средбата со Блинкен за тоа воопшто не стана збор. Не беше ниту споменато“, рече Османи.

За време на неколкудневната посета на САД, Османи и Курти присуствуваа на потпишувањето договор на косовското министерство за економија со американската Корпорација за милениумски предизвик, за инвестирање на над 236 милиони долари во косовскиот енергерски систем.

Ова, напомена Османи, е најголема американска инвестиција која Косово ја добило од САД за енергетскиот сектор и ќе придонесе за надминување на евентуалната криза со снабдување со електрична енергија.

Доколку преземете содржина од оваа страница, во целост сте се согласиле со нејзините Услови за користење.