Швајцарскиот потомок на германски лекар, еден од неколкуте коишто се грижеле за здравјето на германскиот фашистички водач Адолф Хитлер, објави поединости од писма коишто откриваат како оториноларингологот Карл Ото фон Ејкен го лекувал диктаторот поради проблеми со гласот, извести во неделата весникот NZZ am Sonntag.
Весникот пишува дека Фон Ејкен повеќепати го лекувал Хитлер во период од десет години, почнувајќи од 1935 година.
Писмата коишто Фон Ејкен ги испраќал на свој роднина, ги открил Робер Допген, правник на лекарот, кој ги пронашол истражувајќи семејни документи за училишен проект. Фон Ејкен починал во 1960 година.
Британскиот историчар Ричард Еванс, стручњак за германска историја, потврдил дека необјавените писма се автентични, според швајцарскиот весник.
Од писмата се насетува големиот страв на Хитлер од сериозно заболување.
„Ако нешто е лошо, тоа апсолутно морам да го знам“, му рекол Хитлер на лекарот по првите консултации во мај 1935 година, се наведува во едно од писмата.
Весникот наведува и дека детали од писмата укажуваат и на значењето коешто Хитлер му го давал на својот глас. Така, од едно писмо се дознава дека операцијата за отстранување полипи е одложена до одржување на говор на фирерот, како и дека Фон Ејкен на Хитлер му советувал да го одмори гласот по зафатот.
Во своите писма Фон Ејкен никогаш не негирал дека го лекувал човекот чиишто постапки резултирале со милиони ѕверски мачени и убиени луѓе во Втората светска војна, пишува уште швајцарскиот весник.
Фон Ејкен по војната на прашање на руските иследници зошто не го убил Хитлер, одговорил: „Јас бев негов лекар, а не негов убиец“.
