Претседателот Стево Пендаровски, во синоќешното интервју во емисијата „Топ тема“ на телевизијата Телма, образложувајќи меѓудругото зошто сѐ уште не е воведена кризна состојба на цела територија на земјата поради пандемијата од коронавирусот, призна дека раелно Македонија нема ресурси за да се воведе кризна состојба од такви размери.
Ваквите признанија се директно спротивни на довчерашните убедувања, како од страна на самиот шеф на државата, така и од страна на неговите партиски колеги од СДСМ, дека земјата „блескала“ во сите сегменти.
Истакна дека во двете општини каде е воведена кризна состојба – Центар Жупа и Дебар, каде според него живеат околу 10.000 лица, се распоредени над 350 лица, припадници на војската и полицијата, како и здравствени работници.
Да објаснам за колкави ресурси станува збор, ако зборуваме за налик на онаа ситуација што ја имаме во Центар Жупа и во Дебар. Во двете општини, севкупно војска, полиција и здравствени работници имаме над 350 луѓе. За две општини кои по попис имаат 15.000 луѓе, а прашање е дали имаат 10.000 сега. Бидејќи е иселенички крај. Ако се оди така и во сите други општини, објективно во сите 80 општини, тоа е кризна состојба на цела територија, со ова ниво на контрола на влез и излез на границите на општините. Ние тоа не можеме физички да го постигнеме, нагласи Пендаровски.
Наведе дека со комплетно ангажирање на армискиот состав, со комплетно ангажирање на полицискиот состав и на квалификуваните здравствени работници, ние тоа не можеме да го направиме на целата територија.
Една работа е да имате на територија на две општини кризна состојба, друго е да имате на три или на четири. Вчерашната проценка беше дека добро е да воведуваме кризна состојба како што одредени општини ќе доаѓаат на дневен ред со вирусот. Можно е Скопје да оди во таа насока, сѐ уште не е таму, бидејќи е голем град. И објективно оваа бројка што е досега детектирана за толкава бројка на луѓе што живеат тука и во околината, не е алармантна за да мора да се воведе, оцени вчера тој.
Истакна дека треба да се прави сериозна процена за распоредување на сили, не само за војска и полиција, тука и за здравствени работници.
За еден ден имаме практично дуплирање на случаите. Дневно мораме да правиме анализи, сите ние кои сме во ова инволивирани. Филипче кажа дека е можно пикот на вирусот да биде за еден месец од сега и дека е можно 2.000 луѓе да бидат заразени. Тоа значи дека е можно деновиве повторно да се состане Советот за безбедност. Не е исклучено дека ќе треба да се воведе и поинаква состојба, од оваа што ја имаме сега – кризна состојба само во две општини, посочи претседателот.
Пендаровски нагласи дека е изречена и правата казна на човек кој на граница потпишал дека ќе биде во самоизолација. Како што рече, казната е во висина од 1.000 евра, нагласувајќи дека има и повисоки казни за оние кои не ги почитуваат мерките.
