Свет

Пенс најави дека САД ќе формираат „вселенски сили“ за „следното боиште“

Пенс најави дека САД ќе формираат „вселенски сили“ за „следното боиште“

Американскиот потпретседател Мајк Пенс во четвртокот го најави основањето на „вселенските сили“, што пред неколку месеци го најави претседателот Доналд Трамп за САД да доминираат во Вселената.

„Време е да се испише ново поглавје во историјата на нашите вооружени сили, за подготовка на следното боиште каде што ќе бидат повикани најдобрите и најхрабрите Американци за да спречат и да го победат новиот бран закани за нашиот народ и за нашата нација.“, изјави потпретседателот Мајк Пенс во говорот пред војници во Пентагон.

„Чукна часот да ги основаме вселенските сили на Соединетите држави“, порача Пенс.

Додаде, како што најави и претседателот Трамп во мај годинава, дека траат подготовките овие вселенски сили да станат шестиот род од вооружените сили на САД, по копнените војски, воното воздухопловство, морнарицата, маринците и крајбрежната стража.

Меѓутоа, основањето на новиот род на армијата треба да го потврди Конгресот, а Пенс рече дека овој процес ќе се одвива во етапи, така што шестиот род би бил основан до 2020 година. Побара притоа од конгресот да го одобри дополнителниот буџет од 8 милијарди долари во следните пет години.

Американскиот претседател Доналд Трамп ги потврди кон средината на јуни своите намери за основање шести посебен род на американските вооружени сили, ткн „вселенски сили“ (space force) кој би требало да биде засебен од воздухопловството коешто во моментов има надлежност над Вселената.

„Со ова му наредувам на министерството за одбрана веднаш да пристапи кон основање вселенски сили како шести род на вооружените сили. Ќе имаме воздушни сили и вселенски вооружени сили, издвоени но подеднакво важни“, изјави тогаш Трамп во говорот во Белата куќа посветен на Вселената заклучувајќи ја актуелната дебата на жал на многумина кои сакаа оваа вселенска војска да биде во составот на воздухопловните сили.

Трамп уште претходно говореше дека сака основање на шестиот род на армијата, покрај копнените војски, воздухопловството, воената морнарица, поморскиот корпус и крајбрежната стража. Во американскиот Конгрес со години се води жестока расправа меѓу заговорниците на рамноправноста на новиот род војска со другите корпуси и оние коишто мислат дека би било подобро да биде приклучен на воздухопловните сили. Вселенската војска не може да биде формирана преку ноч, и Конгресот во секој случај мора да донесе посебен закон за ова прашање.

Во Конгресот во текот на дискусијата за буџетот на Пентагон беше покренато прашањето за создавање на вооружени сили специјално наменети за Вселената, но оваа идеја беше отфрлена. Против тоа истапи и министерот за одбрана Џејмс Матис и командата на воздухопловните сили. На сослушувањето на 12-ти април пред комитетот за вооружените сили на Претставничкиот дом, Матис појасни дека не сакал да „создаде во министерството за одбрана, коешто самото претставува еден гигантски бирократски апарат, уште една бирократија“.

Како што истакна тогаш Матис, тој ја разбира сета сложеноста на прашањето поврзано со можноста од создавање нов вид сили. „Имаме армија…. Дали сакаме да додадеме уште еден вид воздухопловни сили. Мораме да донесеме соодветно решение пред да насочиме средства за создавање нов вид воздухопловни сили, за регрутирање персонал, негова подготовка итн“, рече челникот на Пентагон.

„За да ја браниме Америка не е доволно само простото присуство во Вселената, мораме да завладееме со космосот. Тоа е многу важни и затоа ја во моментов му наложив на министерството за одбрана неодложно да започне процес кој ќе доведе до формирање вселенски сили“, истакна Трамп на состанокот со членовите на Националниот вселенски совет, според текстот објавен на интернет страницата на Белата куќа.

Трамп повеќепати досега ја искажуваше идејата за формирање на овие сили. Зборувајќи во март годинава пред маринците во воздухопловната база Мирамар во Калифорнија, тој истакна дека „новата национална вселенска стратегија на САД ја препознава Вселената како зона на воени дејствија, како и земјата, воздухот и морето“. „Имаме воздухопловни сили, а ќе имаме и вселенски сили“, рече тогаш Трамп.

Топ вести

собранието денеска одлучува за Собранието на Република Македонија денеска ќе ја одржи 61. седница на која на дневен ред e Предлогот за пристапување кон измена на Уставот на Република Македонија со насоки за негово изменување и дополнување поднесен од Владата. На матичната собраниска Комисија за уставни прашања во петокот по дводневна расправа, беа донесени заклучоци за пристапување кон уставни измени и Владата во рок од 15 дена да изготви нацрт-аманадмани и да ги достави до Парламентот. Поддршка за пристапување кон измените на Уставот дадоа пратеници на владејачкото мнозинство, додека пратениците од ВМРО-ДПМНЕ гласаа против. За да биде усвоена потребата од пристапување кон уставни измени треба да биде изгласана од две третини од вкупниот број пратеници во Парламентот. Во предлогот за измени на Уставот, кој Владата го утврди и соопшти во понеделникот, се предлага: Во целиот текст на Уставот пред Република Македонија се додава придавката северна; Измени во Преамбулата на Уставот со именување конкретни документи на АСНОМ заради усогласување со Договорот со Грција; Поцврста гаранција за трајноста на границите и дека Република Македонија нема територијални претензии и грижа за Македонците и дијаспората во странство што ќе значи дека Републиката ќе се грижи за културните, економските и социјалните права на нејзините припадници во странство без да се меша во суверените права на други држави и во нивните внатрешни работи. Од тоа дали ќе бидат обезбедени две третини за поддршка за измени на Уставот, ќе зависи и дали претстојат нови предвремени парламентарни избори, кои би се организирале со скратени рокови. Од ВМРО-ДПМНЕ порачаа дека уставните измени се апсолвирани и оти нивните пратеници нема да ги гласаат. Најавија дека се подготвуваат за избори. На состанокот на ИК на партијата викендов се разговарало за вонредните парламентарни избори и за термините за нивното одржување: 25 ноември, 2 декември, 9 декември или на пролет со акцент на подготовка на партиската инфраструктура, која е почната и подготовка на програмата со која ВМРО-ДПМНЕ ќе настапи на вонредните парламентарни избори. Премиерот Зоран Заев пак, остава простор и очекува денеска секој пратеник во Парламентот да се соочи со одговорноста и да се изјасни по своја сопствена волја, следејќи го правецот за развој на државата што, според него, го избраа огромното мнозинство од граѓаните кои излегоа и гласаа на референдумот. Имплемнтација на Договорот со Грција и усвојување на уставните амандмани очекува и меѓународниот фактор. Потпретседателот на Соединетите Американски Држави, Мајкл Пенс викендов испрати писмо до претседателот на Владата Зоран Заев во кое му изразува уверување за неговата континуирана поддршка во овој важен момент за земјата и за спроведувањето на историскиот договор од Преспа со Република Грција. Во своето писмо Пенс нагласува дека 90 отсто од оние што гласаа на референдумот го одобрија договорот од Преспа и со тоа ја потврдија огромната посветеност за европската иднина на Република Македонија. – Соединетите Американски Држави ја споделуваат вашата посветеност за поголема сигурност и стабилност на регионот. Бидете уверени во мојата континуирана поддршка во овој важен момент за вашата земја, пишува потпретседателот на САД во своето писмо до премиерот Заев со кого минатиот месец имаа средба во Вашингтон. Високата претставничка за безбедносна и надворешна политика на ЕУ Федерика Могерини вчера во интервју за МИА порача дека Преспанскиот договор е уникатна прилика за помирување и затворање на дводеценискиот спор помеѓу Скопје и Атина и дека оваа прилика може да не се повтори веќе. – Ги разбирам чувствителностите и комплексната историска позадина на спорот, како и изразените загрижености. Спорот не постоеше толку долго без причина, меѓутоа, како што видовме во минатото, колку повеќе времето минува, толку е потешко да се изнајдат решенија. Преговарачкиот процес мора да бил болен и резултатот е компромис. Но, е компромис со кој успешно се исполнуваат клучните интереси на двете страни. Нашата позиција е јасна: ЕУ целосно го поддржува постигнатиот договор. Ова е уникатна можност за помирување на Западниот Балкан која можеби нема да се повтори. Се надевам дека сите страни ќе ги зграпчат моментот и дека ќе обезбедат иднина во ЕУ за земјата, иднина која цела нација се надева со години да стане реалност. МИА СОБРАНИЕПРАТЕНИЦИУСТАВНИ ИЗМЕНИ Спонзорирано видео

Уставните промени според договорот со Грција пред пратениците