Така наречениот „плеј ин“ турнир по завршувањето на регуларниот дел од сезоната во НБА, кој во разни формати се применуваше во последните три сезони, станува постојан дел од календарот во најсилната кошаркарска лига во светот, одлучија сопствениците на клубовите на годишниот состанок во Лас Вегас.
Тоа значи дека и во иднина пласман во разигрувањето за титулата обезбедуваат шесте најуспешни екипи од секоја конференција по лигашкиот дел од сезоната, додека екипите пласирани од седмото до десеттото место ќе играат „плеј ин“ турнир за седмиот и осмиот патник.
Воведено е и ново правило во играта кое предвидува построго санкционирање на прекршоци кои спречуваат противнапад на противничкиот тим.
Досега таквите тактички прекршоци се казнуваа само со уфрлување на топката од страна за противничкиот тим, а со новото правило екипата која е спречена во контранапад добива автоматски едно слободно фрлање и го задржува поседот на топката.
