По антивладините протести Борисов остана без четворица министри

Прифатени се оставките на министрите за финансии Владислав Горанов, за внатрешни работи Младен Маринов, за економија Емил Караниколов и за туризам Николина Ангелкова, соопшти бугарскиот премиер Бојко Борисов по средбата со коалициските партнери.

Оставките доаѓаат во момент на секојдневни антивладини протести во Софија и во повеќе други бугарски градови, со барања за оставка на Владата и на јавниот обвинител Иван Гешев, како и за одржување фер избори.

Нова министерка за туризам ќе биде вицепремиерката Маријана Николова, која ќе ги извршува и двете функции. Директорот на полицијата Христо Терзиски ќе го преземе Министерството за внатрешни работи, Лачезар Борисов, кој моментно е заменик министер за економија, сега ќе биде министер во тој ресор, а Кирил Ананиев ќе го предводи Министерството за финансии. За министер за здравство треба да биде именуван Костадин Ангелов, актуелен директор на Александровската болница.

Доколку преземете содржина од оваа страница, во целост сте се согласиле со нејзините Услови за користење.