Висок претставник на американската администрација денеска ја опиша презентацијата на новата интерконтинентална балистичка ракета на Северна Кореја како „разочарувачка“ и повика на преговори насочени кон постигнување целосна денуклеаризација.
„Разочарувачки е да се види како Северна Кореја продолжува да ги става забранетите нуклеарни и балистички ракетни програми пред работата кон подобра иднина на луѓето во Северна Кореја“, изјавил американскиот официјален претставник.
„Соединетите држави ја повикуваат Северна Кореја да се вклучи во одржливи и значајни преговори за да се постигне целосна денуклеаризација“, додаде тој.
Северна Кореја денеска на воената парада покажа претходно невидени ракети.
За прв пат по две години, Северна Кореја демонстрираше ракети со голем дострел на воената парада. На парадата била покажана и Хвасонг-15, ракетата со најдолг дострел некогаш тестирана во Северна Кореја и, се чини, нова балистичка ракета истрелана од подморница.
Пред парадата, по повод 75-годишнината од основањето на Работничката партија, јужнокорејските и американските власти соопштија дека Ким Џонг -ун може да го искористи настанот за да открие ново „стратешко оружје“ што го вети претходно оваа година.
Балистичките ракети сега се презентираат за прв пат на воена парада откако Ким започна да се состанува со американските лидери, вклучувајќи го и американскиот претседател Доналд Трамп во 2018 година.
„Ќе продолжиме да ја градиме нашата одбранбена сила со цел спречување на војна“, рече Ким, истакнувајќи дека воената сила нема да се користи превентивно. Тој не се осврна директно на разговорите со САД или на денуклеаризацијата.
