Американскиот државен секретар Мајк Помпео изјави во неделата дека продажбите на оружје за Иран ќе ги прекршат резолуциите на Обединетите нации и ќе доведат до санкции, откако Техеран објави дека завршило долгогодишното ембарго на светската организација за трговија на оружје со Иран.
„САД се подготвени да го санкционираат секој физички и правен субјект кој значително придонесува за испорака, продажба или трансфер на конвенционално оружје од или до Иран. Секоја земја што се стреми кон мир и стабилност на Блискиот Исток и ја поддржува борбата против тероризмот, мора да се воздржи од каков било договор за вооружување со Иран“, се вели во соопштението на Помпео.
Техеран, кој сега може да купува оружје од Русија, Кина и од други земји, го поздрави крајот на ембаргото како дипломатска победа над својот децениски непријател САД, кои се обидоа да одржат неодредено замрзнување на продажбата на оружје.
Претседателот Доналд Трамп ги повлече САД од нуклеарниот договор во 2018 година и започна еднострано да воведува санкции против Иран.
Помпео нагласи дека „во изминатите 10 години, земјите се воздржуваа од продажба на оружје на Иран под различни мерки на ООН. Секоја земја што сега ќе ја прекрши таа забрана, ќе избере многу јасно поттикнување на конфликтот и заканата по мирот и безбедноста“.
