Повредени полицајци на протестот во Љубљана против ковид мерките

Противници на мерките за борба против коронавирусот вечерва протестираа на плоштадот „Република“ во Љубљана, барајќи промена на мерките и Владата да поднесе оставка.

По два часа, тие запалија факели и почнаа да ги фрлаат кон Собранието на Словенија, објави Н1 Словенија. За време на протестот повредени се неколку полицајци, а хеликоптери го надлетувале градот.

Како што јавуваат словенечките медиуми, демонстрантите имале две барања: промена на мерките за борба против Ковид-19 во препораки и предвремени избори.

Пред протестот, организаторите повикаа на мирен собир, но инцидентот се случи веднаш штом непознато лице фрли шише кон еден од полицајците што го обезбедуваа собирот. Собраните луѓе се приближија и до влезот во зградата на Собранието, поради што полицијата го засили своето присуство пред Националното собрание, јавија словенечките медиуми.

Како што е наведено, за да ја растера толпата која фрлаше факели кон Парламентот, полицијата одговори со солзавец и водени топови.

Доколку преземете содржина од оваа страница, во целост сте се согласиле со нејзините Услови за користење.