Во дербито на вечерта од второт коло на фудбалската Лига на шампионите, Барселона на својот „Камп Ноу“ го победи Интер со 2:1, правејќи пресврт во второто полувреме, додека Ливерпул во „убавицата на вечерта“ на својот „Енфилд“ го победи РБ Салцбург со 4:3.
Интер уште на самиот почеток ја изненади несигурната од почетокот на сезонава Барселона и веќе во 2 минута Лаутаро Мартинез, по грешката на Бускетс на средината на теренот му побегна на Ленгле и стрелаше за водство. Мартинез имаше одлична можност да го удвои водството на гостите во 37 минута, но неговиот удар со глава фантастично го запре Мар-Андре Тер-Штеген. Откако во првиот дел Интер беше подобриот противник, во второто полувреме Барселона влезе поагресивно и во 58 минута израмни со одличниот волеј удар на Луис Суарез од 16-ина метри. Уругваецот во 84 минута по проигрувањето од Лионел Меси одлично во првиот контакт со топката го измами Годин и пласираше под Самир Хандановиќ за водство од 2:1, што беше и крајниот резултат.
Во истата Група Ф, Борусија Дортмунд на гостувањето ја победи прашка Славија со 2:0. Главен играч на „Милионерите“ на овој меч беше двојниот стрелец Ашраф Хаким кој погоди во 35 и 89 минута. Мароканскиот бек, кој во Дортмунд стаса во јули минатата година на двегодишна позајмица од Реал Мадирд, двата погодока ги постигна по брзи контра-напади.
На табелата Борусија и Барслона имаат по четири бода, додека Славија и Интер имаат по еден.
Во Групата Е, актуелниот европски шампион Ливерпул имаше водство од 3:0, РБ Салцбург успеа да израмни, но на крајот австрискиот тим немаше сила и среќа за изненадување и потклекна на „Енфилд“. Домашните веќе во 36 минута водеа со 3:0, со головите на Мане во 9, Робертсон во 25 и Салах во 36 минута и се чинеше дека Салцбург е пред катастрофа. Но Хе-Чан во 39 минута намали а во второто полувреме Минамино во 56 и Хааланд во 66 го шокираа гледалиштето. Но радоста на гостите кусо траеше, бидејќи во следната минута Салах го врати водството кај англискиот тим.
Во вториот меч од групата Генк и Наполи, за кој како стартер цел час одигра македонскиот репрезентативец Елиф Елмаз, играа без голови. Наполитанците во првото полувреме дури трипати ја погодија стативата на противиничкиот гол, двапати Аркадиуш Милик а еднаш Хозе Каљехон.
На табелата од Групата Е Наполи води со четири бода, Ливерпул и РБ Салцбург имаат по три бода, а Генк еден.
Во Групата Х, Челзи на гостувањето го победи Лил со 2:1. „Сините“ поведоа во 22 минута преку Ејбрахам, а израмни Осимен во 33 минута. Челзи до победата стаса со убавиот погодок на Вилиан во 78 минута.
Ајакс на „Местаља“ со 3:0 ја победи домашната Валенсија. Холандскиот тим поведе во 8 минута со фантастичниот гол на Зијех, а Валенсија можеше да израмни во 25 минута, но Дани Парехо не реализираше пенал. Казната стаса во 34 минута, кога Промес го удвои водството на гостите, а прашањето на победникот го реши Ван де Беек во 67 минута.
На табелата води Ајакс со шест бодови, Валенсија и Челзи имаат по три бода, а Лил е без бодови.
Во Групата Г Зенит во Санкт Петербург беше убедлив со 3:1 против Бенфика. Победа за рускиот тим донесоа Дзјуба во 22, Рубен Дијас со автогол во 70 и Азмоун во 78 минута, додека почесниот гол за Португалците го постигна Де Томас во 85 минута.
Во вториот меч Лион како гостин го совлада РБ Лајпциг со 2:0, а стрелци беа Депаи во 11 и Тереиро во 65 минут.
На табелата Зенит и Лион имаат по четири бода, РБ Лајпциг остана со три бода, а Бенфика во двете кола не освои ниеден бод.