Владата на својата 71-ва седница одржана во вторникот го разгледа и прифати Акцискиот план за проектот „Зајакнување на дневните болници“, и притоа го задолжи Министерството за здравство на секои шест месеци до Владата да доставува информација за прогрес на активности од акцискиот план, сѐ до конечна реализација на проектот.
Како што соопштија од владината прес-служба, проектот „Зајакнување на дневните болници“ се однесува на концепт на воведување „one day surgery“, односно еднодневна терапија од областа, и други „out patient“, односно процедури без ноќевање и болнички престој на пациентите во случаи кога нема потреба од опсервација на состојбата на пацинетот.
„Во оваа насока ќе бидат изготвени упатства и ќе бидат адаптирани соодветни просторни услови во рамките на општите и клиничките болници каде постојат услови врз основа на направена процена“, се наведува во соопштението.
На денешната седница, Владата го именуваше поранешниот заменик-министер за здравство, Гоце Чакаровски, за Национален координатор за здравство.
