Денеска (20.08.2024) во СВР Скопје било пријавено кривично дело убиство на паркинг простор пред трговски центар „Мавровка“ во Скопје, при што со огнено оружје е застрелано едно лице и починало на местото.
Очевидци велат дека напаѓачите пукале во жртвата, дека од неговиот автомобил одзеле повеќе предмети, меѓу кои и лаптоп-компјутер, а потоа побегнале.
Застреланиот човек е адвокат, а според првични информации, неговите иницијали се В.Е.
Тој наводно со членови на семејството бил да заврши приватни обврски во близина на трговскиот центар.
„Од страна на полицијата веднаш се преземени оперативно – тактички мерки, затворање на дел од градското подрачје, преглед на повеќе домови и преглед на повеќе возила, во кои се вклучени специјални полициски сили, хеликоптери и дронови“, се вели во соопштението на МВР и се додава:
„Имено, на подрачјето на Општина Чаир, забележено е патничко возило, кое се обидело да побегне, при што лицата од возилото пружиле отпор со употреба на огнено оружје. Полициските службеници возвратиле, по што едно лице е лишено од слобода. При преземањето понатамошни мерки, од слобода било лишено уште едно лице, а на полицијата е познат и идентитетот на третото осомничено лице кое е во бегство и за кое се преземаат мерки за негово пронаоѓање“.
Министерството за внатрешни работи ги информира граѓаните дека во периодот што следува во некои делови од град Скопје ќе има зголемено полициско присуство со цел целосно расчистување на случајот .
