Во мултимедијалниот центар „Матица ексклузив“ во Скопје утре во 12 часот ќе се одржи промоција на книгата „Пурпурна јанѕа“ од Ефтим Клетников. За делото на познатиот поет, критичар и преведувач промотивна реч ќе одржи поетот и литературен критичар Раде Силјан. Стихови ќе интерпретира артистката Соња Каранџулоска, а чинот на промоцијата ќе го збогати маестро Драган Даутовски со изведба на неколку музички творби.
Ефтим Клетников (Негрево, 1946 ) спаѓа во редот на најкомплетните современи македонски писатели. Во изминатите четири децении објави петнаесет дела од областа на критиката и есејот, девет дела за деца и млади, седумнаесет стихозбирки, десет антологиски избори, преведе над педесет дела од руската, француската, српската и словенечката литература.
