Граѓаните на општина Гази Баба денес ќе организираат протест против отворање на Центар за зависници во нивната општина.
Жителите повикуваат на протест во 12 часот пред Капија на МЗТ Маџари.
„Граѓанската иницијатива СТОП за отворање на Центар за зависници во Општина Гази Баба поканува Ваша екипа да присуствува на протестот против најавите од Министерот за здравство Венко Филипче за отворање на Центарот за зависници во Општина Гази Баба.
Протестот ќе се оддржи на ден 25.05.2019 година со почеток во 12 часот на улица Перо Наков во населба Маџари (пред капијата на фабриката Металски Завод Тито).
Претставници на иницијативниот одбор ќе дадат изјава за медиумите на кој ќе ги соопштат барањата на граѓаните„-се наведува во поканата.
Установата за третман на зависностите од дрога ќе биде префрлена во поранешната менза на фабриката „Металски Завод-Тито“.
Министерството за здравство веќе има добиено решение од градоначалникот на Гази Баба, Борче Георгиевски. Дислокацијата треба да се случи до крајот на годинава.
Станува збор за објект кој не е во сопственост на општината, за таа да може да дава согласност за користење. Од друга страна, ако веќе општината треба да се изјасни, оваа одлука мора да помине низ Советот, односно за неа да гласаат советниците од сите партии. Како Георгиевски сам одлучил дали нешто може или не смее да се случи, тоа допрва ќе треба да се обелодени.
Главниот проблем поради кој се јави потреба за дислокација на Центарот за зависници се ужасните услови и чувството за небезбедност меѓу граѓаните на општина Кисела Вода. Овој Центар требаше само времено да биде лоциран во општината, но таму е останат веќе 20 години.
Сега, ќе биде решен проблемот со стравот кај граѓаните од Кисела Вода, на грб на граѓаните на Гази Баба.
Како што дознава КУРИР, оваа одлука ја нема донесено општината, туку градоначалникот лично. Граѓаните кои ја контактираа нашата редакција не го кријат својот револт.
Тие првично се огласија на социјалните мрежи, а имаат и формирано иницијативен одбор кој во наредните денови ќе превземе низа на активности против отварање на ваков Центар во Гази Баба.
Граѓаните на Гази Баба кои ја контактираа редакцијата на КУРИР најавуваат мирен протест. Велат, ова е само првиот чекор кој го превземаат, а допрва ќе се спротивстават на одлуката Центарот за зависници да биде лоциран во нивната општина.
