Првиот основците во Општина Аеродром останаа гладни, Марин молчи

107

На првиот училишен ден од второто полугодие децата што посетуваат целодневна настава во основните училишта низ скопски Аеродром останаа гладни. Оние родители што не знаеле дека нема да има храна за учениците, не подготвиле оброци од дома. Но дел велат оти на време биле информирани, јави ТВ Алфа.

Проблемот, неофицијално, е поништена постапка за избор на фирма на ниво на општина. А истиот не е решен и по три неделниот распуст што понуди можност за решение која компанија да биде задолжена за храната на децата. Директорите на училиштата не сакаа да говорат пред камерите на телевизијата. Некои од нив не сакале ниту да ги примат внатре, па преку обезбедувањето порачале оти не биле расположени за разговор со новинири. Но дел беа, па зад камерата на Алфа појасниле оти проблем има, но не знаат кога ќе биде решен односно кога ќе биде завршена постапката.

Според директорите, изборот на фирма за храна, секое училиште, си го вршело посебно, но од лани, организацијата за ова оди преку општината.

Од Алфа се обиделе да стапат во контакт со градоначалникот Златко Марин. Освен што не одговорил на телефонските повици, решил да ги игнорира и смс пораките. Но, од ПР службата е посочено оти ќе добијат одговори во писмена форма.

До почетокот на овие вестите на ТВ Алфа одговор на прашањата, помеѓу кои, зошто постапката доцни и според кои правилници избор на фирма се врши за сите училишта, немало.

Па, неминовно се поставуваат прашањата, до кога учениците ќе седат гладни, и дали и со храната ќе се повтори истото како со чекањето на униформите што траеше со месеци?

За потсетување, во планот за живот за локалните проблеми со воспитно -образовните институции стои дека во општина Аеродром ќе се води посебна сметка за здравата искрана на децата. А има и многубројни ветувања за подобрување на условите.

-Нови детски градинки во населба Мичурин и населба Лисиче (Тодор Чангов); Енергетски ефикасни градинки (реконструкција на постојните); Нови наставно-образовни помагала; Континуирано обновување на наставно-образовните помагала и инвентар; Нови детски игралишта и континуирано одржување на веќе постојните; Посебна грижа за здравата исхрана на децата, се наведува во програмата.

Засега од здравата исхрана, родителите чекаат само на навремено обезбедување на истата.

Доколку преземете содржина од оваа страница, во целост сте се согласиле со нејзините Услови за користење.