Албанскиот премиер Еди Рама на Твитер објави дека неговата земја е избрана за привремен член на Советот за безбедност во Обединетите нации, нарекувајќи ја добра вест.
– Добра вест. Со 175 гласови од 117 потребни, Албанија штотуку е избрана за членка на Советот за безбедност на ООН за 2022-2023 година, напиша Рама.
Веднаш реагираше евроамбасадорот во Тирана, Луиџи Сореца, кој преку објава на социјалните мрежи оцени дека ова е историски ден за Албанија.
– Историски ден за Албанија и нејзиниот народ. Честитки за изборот за член на Советот за безбедност на Обединетите нации 2022-2023! Со нетрпение очекуваме да работиме уште поблиску заедно во решавањето на глобалните проблеми, напиша Сореца.
Изборот го честиташе и амерканската амбасадорка Јури Ким, додавајќи дека САД очекуваат поблиска соработка со Албанија во регионот и светот.
– Историјата се случи. Честитки за Албанија за првпат избрана во Советот за безбедност на Обединетите нации. САД очекуваат поблиска соработка со Албанија во регионот и светот. Честитки, напиша Ким.
Албанија денеска беше избрана за непостојана членка на Советот за безбедност на ОН. Ова е првпат таа да биде избрана за оваа функција, 65 години по нејзиното членство во Обединетите нации.
Доколку преземете содржина од оваа страница, во целост сте се согласиле со нејзините Услови за користење.
